Qazaqstannyń birinshi, álemniń 19-raketkasy Elena Rybakina Ábý-Dabi WTA 500 týrniriniń shirek finalyna shyqty, dep habarlaidy "Ult aqparat".
Jarystyń 6-raketkasy bolyp tirkelgen qazaqstandyq tennisshi úshinshi ainalymda álemniń 72-raketkasy, reseilik Daria Kasatkinamen kezdesti.
Budan buryn qarsylastar ózara bir ret kezdesip, onda reseilik tennisshi basym túsken edi.
Bul joly birinshi partiiada breik jasai bilgen E.Rybakina sol basymdylyǵyn saqtai aldy – 6:3.
Elena ekinshi setti breikpen bastap, óz geimin aldy – 2:0. Taǵy bir breik – 3:0. Budan keiin D.Kasatkina qaiyra breik jasap, esepti qysqartty. Degenmen qazaqstandyq sportshy matchty jeńispen túiindei bildi – 6:4.
Báseke 1 saǵattan astam ýaqytqa sozyldy.
Osylaisha E.Rybakina D.Kasatkinadan ótken jylǵy jeńilisinen qarymta qaiyrdy.
E.Rybakina jartylai finalǵa shyǵý úshin álemniń 10-ynshy, osy dodanyń 4-raketkasy, Belarýs ókili Arina Sobolenkomen sheberlik baiqasady. A.Sobolenko úshinshi ainalymda týnis tennisshisi Ons Jaberdi 6:2, 6:4 esebimen tize búktirdi. Sóitip ol ótken maýsymnyń sońynan beri qatarynan 12-inshi jeńisine qol jetkizdi.
Júlde qory 565 myń AQSh dollaryna baǵalanǵan doda 13 qańtarda aiaqtalady.
Eske sala keteiik, budan buryn E.Rybakinanyń Ábý-Dabi týrniriniń úshinshi ainalymyna shyqqanyn jazǵan bolatynbyz.
