قازاقستاننىڭ بٸرٸنشٸ, ەلەمنٸڭ 19-راكەتكاسى ەلەنا رىباكينا ەبۋ-دابي WTA 500 تۋرنيرٸنٸڭ شيرەك فينالىنا شىقتى, دەپ حابارلايدى "ۇلت اقپارات".
جارىستىڭ 6-راكەتكاسى بولىپ تٸركەلگەن قازاقستاندىق تەننيسشٸ ٷشٸنشٸ اينالىمدا ەلەمنٸڭ 72-راكەتكاسى, رەسەيلٸك داريا كاساتكينامەن كەزدەستٸ.
بۇدان بۇرىن قارسىلاستار ٶزارا بٸر رەت كەزدەسٸپ, وندا رەسەيلٸك تەننيسشٸ باسىم تٷسكەن ەدٸ.
بۇل جولى بٸرٸنشٸ پارتييادا برەيك جاساي بٸلگەن ە.رىباكينا سول باسىمدىلىعىن ساقتاي الدى – 6:3.
ەلەنا ەكٸنشٸ سەتتٸ برەيكپەن باستاپ, ٶز گەيمٸن الدى – 2:0. تاعى بٸر برەيك – 3:0. بۇدان كەيٸن د.كاساتكينا قايىرا برەيك جاساپ, ەسەپتٸ قىسقارتتى. دەگەنمەن قازاقستاندىق سپورتشى ماتچتى جەڭٸسپەن تٷيٸندەي بٸلدٸ – 6:4.
بەسەكە 1 ساعاتتان استام ۋاقىتقا سوزىلدى.
وسىلايشا ە.رىباكينا د.كاساتكينادان ٶتكەن جىلعى جەڭٸلٸسٸنەن قارىمتا قايىردى.
ە.رىباكينا جارتىلاي فينالعا شىعۋ ٷشٸن ەلەمنٸڭ 10-ىنشى, وسى دودانىڭ 4-راكەتكاسى, بەلارۋس ٶكٸلٸ ارينا سوبولەنكومەن شەبەرلٸك بايقاسادى. ا.سوبولەنكو ٷشٸنشٸ اينالىمدا تۋنيس تەننيسشٸسٸ ونس جابەردٸ 6:2, 6:4 ەسەبٸمەن تٸزە بٷكتٸردٸ. سٶيتٸپ ول ٶتكەن ماۋسىمنىڭ سوڭىنان بەرٸ قاتارىنان 12-ٸنشٸ جەڭٸسٸنە قول جەتكٸزدٸ.
جٷلدە قورى 565 مىڭ اقش دوللارىنا باعالانعان دودا 13 قاڭتاردا اياقتالادى.
ەسكە سالا كەتەيٸك, بۇدان بۇرىن ە.رىباكينانىڭ ەبۋ-دابي تۋرنيرٸنٸڭ ٷشٸنشٸ اينالىمىنا شىققانىن جازعان بولاتىنبىز.
