Qazaqstandyq, álemniń 193-raketkasy Dmitrii Popko Kiev chellendjer týrniriniń shirek finalyna ótti, dep habarlaidy QazAqparat.
Osy jarystyń 4-raketkasy bolyp tirkelgen Popko ekinshi ainalymda dúniejúzilik reitingte 342-orynda turǵan italiialyq Franchesko Fortimen kezdesti.
Saǵat jarymnan astam ýaqytqa sozylǵan matchta qazaqstandyq tennisshi 7:5, 6:2 esebimen jeńiske jetti.
Báseke barysynda Popko 11 breik-pointtyń altaýyn paidalandy. Qarsylasy 1 eis jasap, 3 breikke qol jetkizdi.
Popko jartylai finalǵa shyǵý úshin reitingte 347-satydaǵy túrkiialyq Ergi Kirkinmen talasady.
Eske sala keteiik, budan buryn Timofei Skatovtyń Kiev týrniriniń shirek finalyna shyqqanyn jazǵan bolatynbyz.
T.Skatovtyń shirek finaldaǵy qarsylasy – portýgaliialyq Nýno Borges.
