Qazaqstannyń birinshi, álemniń 39-raketkasy Aleksandr Býblik Istbýrn (Ulybritaniia) ATP 250 týrnirin jeńispen bastady, dep habarlaidy "Ult aqparat".
Býblik alǵashqy ainalymda negizgi dodaǵa irikteý saiystarynan keiin qosylǵan otandasy, dúniejúzilik reitingte 106-orynda turǵan Mihail Kýkýshkinmen kezdesti.
Buǵan deiin qarsylastar bir-aq ret sheberlik baiqasyp, onda Kýkýshkinniń mereii ústem bolǵan eken.
Bul joly Býblik oiyn tizginin birden qolyna alyp, 6:1, 6:4 esebimen jeńiske jetti.
Bir saǵatqa jýyq ýaqytqa sozylǵan matchta Býblik 18 eis, 4 breik jasady. Qarsylasy bir breikke ǵana qol jetkizdi.
Býblik shirek finalǵa shyǵý úshin álemniń 72-raketkasy, Belarýs ókili Egor Gerasimovpen talasady.
Taǵy bir qazaqstandyq Dmitrii Popko Ýimbldon týrniriniń irikteý saiysynda latviialyq Ernest Gýlbisten 3:6, 7:5, 4:6 esebimen jeńilip qaldy.
