Teńgege syrtqy naryqtaǵy oqiǵalar men syrtqy faktorlardyń túrli baǵytta áser etýi týraly Ulttyq Banktiń Monetarlyq operatsiialar departamenti direktory Nurjan Tursynhanov aityp berdi, dep habarlaidy QazAqparat.
«Eń aldymen, teńgeniń nyǵaiýyna munai baǵasynyń ósýi áser etti. Brent etalondyq surypty munai baǵasyn belgileý beisenbiniń ashylý baǵasymen salystyrǵanda, juma kúni tańerteń 5%-dan astam qosyp, buryn qol jetkizilgen eń joǵary mánderge qaita oraldy. Munai eksporttaýshy elder uiymy sáýirde óndiris kólemin ózgerissiz saqtaý týraly kútpegen sheshim shyǵardy. Bul sheshim munai naryǵynda qalyptasqan jaǵdaiǵa sebep boldy. Sonymen qatar, Saýd Arabiiasy óndiristi kúnine 1 mln barrelge erikti túrde qysqartýdy saqtaǵysy keletin nietin jetkizdi», - deidi Nurjan Tursynhanov.
MEEU+ ministrler kezdesýi 4 naýryzda beisenbide ótken bolatyn. Buǵan deiin kezdesý qorytyndysy boiynsha, elder óndirýdi kúnine 0,5 mln barrelge arttyrady dep kelisilgen bolatyn.
«Ekinshi jaǵynan, kóptegen valiýtalarǵa qarsy AQSh dollarynyń nyǵaiýy baiqaldy. FRJ jumyspen qamtý men infliatsiiada aitarlyqtai ilgerileýge deiin yntalandyrýshy monetarlyq saiasatty saqtaýǵa mindetteme bergenin málimdegenimen Dj. Paýell óziniń Wall Street Journal-ǵa bergen keshegi suhbatynda jyl basynan beri obligatsiialar kiristiliginiń ósýine asa kóp alańdaýshylyq bildirmedi. FRJ basshysynyń suhbaty AQSh memlekettik qundy qaǵazdarynyń kiristiliginiń ósýine taǵy bir serpin berdi. 10 jyldyq qazynashylyq obligatsiianyń kiristiligi 2020 jylǵy aqpannyń ortasynan bastap alǵash ret 1,57% deńgeiine jetti. Bul Emerging markets tartymdylyǵynyń tómendeýine áser etti», - deidi Ulttyq Banktiń Monetarlyq operatsiialar departamenti direktory.
FRJ basshysynyń málimdemesi AQSh dollarynyń álemdik valiýtalarǵa, onyń ishinde damýshy elderdiń valiýtalaryna qatysty nyǵaiýyna yqpal etti. Ońtústik Afrika randy beisenbi kúni tańerteńnen bastap juma aralyǵynda 1,5%-ǵa, Braziliia realy 0,9%-ǵa, Meksika pesosy 0,8%-ǵa álsiredi.
Teńgege qysymnyń qosymsha faktory Resei rýbliniń álsireýi boldy. Ol Bloomberg habarlamasy aiasynda AQSh pen Ulybritaniia himiialyq qarýdy paidalanǵany úshin Reseige qarsy qosymsha sanktsiialar engizý múmkindigin talqylaityn derekkózderge silteme jasai otyryp, 0,7%-ǵa arzandady. AQSh sońǵy shara retinde EO-pen birge derbes boryshqa sanktsiialar engizý týraly máseleni qarastyratyny týraly habarlady. RF OB derekteri boiynsha, sheteldik investorlar jalpy naryqtyń 23,4%-yn ielene otyryp, federaldyq boryshtyń rýbldegi obligatsiialarynda 42,8 mlrd dollar ustaidy», - dedi Tursynhanov.
