Búgin Premer-Ministr Baqytjan Saǵyntaevtyń tóraǵalyǵymen ótken Úkimet otyrysynda 2018 jyldyń segiz aiyndaǵy infliatsiia deńgeii týraly derekter qaraldy, dep habarlaidy "Ult aqparat".
Ulttyq ekonomika ministri Timýr Súleimenovtyń baiandaýynsha, jyl basynan beri infliatsiia deńgeii jańa dáliz 5-7% aralyǵynda saqtalyp otyr. Tamyzda infliatsiia 0,2% qurasa, jyldyń basynan beri — 2,9% qurady. Jyldyq infliatsiia 6% qurady.
«Aǵymdaǵy jyldyń basynan beri 2017 jyldyń sáikes kezeńimen salystyrǵanda infliatsiianyń barlyq quramdaýyshtary boiynsha baǵa ósýiniń báseńdegeni baiqalyp otyr. Azyq-túlik taýarlaryna baǵa ósýi 2,3% qurady. Azyq-túlik emes taýarlarǵa – 3,6%. Aqyly qyzmetterge baǵalar men tarifter 3%», — dep habarlady ulttyq ekonomika ministri.
Onyń aitýynsha, sońǵy úsh aida azyq-túlik taýarlaryna baǵanyń tómendegen baiqalyp otyr, bul infliatsiia quramdaýyshtarynyń ishinde eń tómen mánge ákeldi.
Sonymen qatar, azyq-túlik emes taýarlarǵa baǵanyń eń kóp óskeni tirkeldi. Bul rette, dizel otynyna, aiaq kiimge, suiytylǵan gazǵa, dári-dármekke jáne turmystyq buiymdarǵa baǵanyń óskeni baiqalyp otyr. T. Súleimenovtyń aitýynsha, aqyly qyzmetterdiń baǵasy ortasha qarqynmen ósti.
«Aqyly qyzmetterdiń ishinde baǵanyń eń kóp óskeni áýe jáne temir jol kóligi qyzmetterine, quqyqtyq qyzmetterge tirkeldi. Sondai-aq, avtomobilderge tehnikalyq qyzmet kórsetýge jáne qonaq úi qyzmetterine baǵa tómendedi», — dedi ol.
Jyl basynan beri óńirlik bóliniste joǵary infliatsiia deńgeii, ortasha respýblikalyq deńgeiden (2,9%) shamammen 1 paiyzdyq tarmaqqa asyp, Atyraý (3,8%), Mańǵystaý (3,8%) óńirlerinde baiqalady. Ortasha respýblikalyq deńgeiden az ǵana Soltústik Qazaqstan (3,3%), Qyzylorda oblystary (3,2%), Astana q. (3,2%) jáne Pavlodar oblysy(3,1%) asty.
Ulttyq ekonomika ministriniń aitýynsha, teńgeniń álsireýi baǵa men tarifterge qysym kórsetedi. Baǵa men ulttyq valiýtanyń arasyndaǵy joǵary korreliatsiiany eskere otyryp, aǵymdaǵy teńge baǵamynda infliatsiia deńgeii 1 paiyzdyq tarmaqqa ulǵaiýy múmkin.
«Teńgeniń birshama álsireýin jáne infliatsiianyń maýsymdylyǵyn eskere otyryp, 2018 jyldyń qorytyndylary boiynsha infliatsiia deńgeii baǵalaý boiynsha jańa aralyqtyń joǵarǵy deńgeiine jaqyn bolady — shamamen 6,6%–6,8%. IV toqsanda infliatsiialyq protsesterdiń kúsheietinin nazarǵa ala otyryp, jergilikti atqarýshy organdar turaqtandyrýshy qorlaryn ýaqytyly tolyqtyrýy, baǵaǵa monitoring jasai otyryp kómir men dizel otynynyń úzilissiz jetkizilimderi boiynsha jumysty kúsheitýi qajet», — dedi T. Súleimenov.
Ulttyq bank tóraǵasy D. Aqyshev, óz kezeginde, Ulttyq banktiń boljamdary boiynsha infliatsiia deńgeii 2018 jylǵa josparlanǵan dálizde saqtalatynyn, alaida 2019–2020 jyldary belgilengen dálizden asýy múmkin ekenin aityp ótti.
«Birinshiden, bul Resei Federatsiiasyna qarsy sanktsiialar rejimimen bailanysty, ekinshiden, buǵan munai baǵasynyń tómendeýi sebep, úshinshiden – áleýmettik shyǵyndar men nesielerdiń ósimi sebep», — dep naqtylady D. Aqyshev.
Premer-Ministr Baqytjan Saǵyntaev máseleni qaraý qorytyndysy boiynsha taýarlar men qyzmet túrlerine baǵanyń negizsiz ósýine jol bermeýdi qatań baqylaýǵa alýdy tapsyrdy. Atalǵan másele ai saiyn qaralyp otyrady.
