Qazaqstannyń depozitterge kepildik berý qory teńgedegi jinaq, merzimdi jáne merzimsiz depozitter boiynsha usynylǵan eń joǵary mólsherlemelerdi ulǵaitýda. Búgin keibir depozitter boiynsha eń joǵary mólsherlemelerdiń máni qaita qaraldy, dep habarlaidy "Ult aqparat" qordyń baspasóz qyzmetine silteme jasap.
Ózgerister búgin kúshine enedi: bankter endi depozitterdi edáýir joǵary mólsherlemelermen qabyldaýǵa quqyly.
Usynylǵan eń joǵary syiaqy mólsherlemelerin qaita qaraý – aqsha naryǵyndaǵy sharttardyń ózgerýine berilgen barabar jaýap. Eske salamyz, bazalyq mólsherleme 9,25 paiyzdan 12 paiyzǵa kóterilip, onyń paiyzdyq dálizi +/- 0,5 paiyzdyq tarmaqqa keńeitilgen bolatyn.
«Uzaq merzimdi jinaq salymdar eń joǵary tabysty salymdar bolyp qala beredi. Bir jyl merzimge ashylǵan jáne tolyqtyrylmaityn jinaq salymdar boiynsha usynylǵan eń joǵary mólsherleme 15,1 paiyzǵa , eki jyl merzim boiynsha – 15,5 paiyzǵa ósedi.Bul buǵan deiingi mánderden 1 paiyzdyq tarmaqqa joǵary. Jinaq salymdarǵa degen suranys báseńdegen joq. Kerisinshe aqshanyń quny ózgerip jatqan jaǵdaida bul salymdar edáýir joǵary tabys ákeledi. Onyń ústine atalmysh salymdar QDKBQ tarapynan qorǵalady» delingen habarlamada.
Tolyqtyrýǵa jáne kez kelgen ýaqytta alýǵa bolatyn merzimsiz salymdar – bul jalpy buqaralyq ónim – mundai depozitter barlyq bankterdiń depozitter jelisinde bar. Ótken aptada merzimsiz salymdar boiynsha usynylǵan eń joǵary mólsherlemerdiń máni qaita qaralǵan soń, oǵan qosa bazalyq mólsherlemeniń paiyzdyq dáliziniń keńeitilýine bailanysty QDKBQ búgin bazalyq mólsherlemeniń spredin 0,5-ten 1 paiyzdyq tarmaqqa ulǵaitty. Bankter búginnen bastap-aq merzimsiz salymdardy 13 paiyzǵa deiingi mólsherlememen qabyldaýǵa quqyly.
«Úsh jáne alty ailyq qysqa merzimdi jinaq salymdar QDKBQ-nyń bazalyq mólsherlemeden tys spredti 1-den 2 paiyzdyq tarmaqqa deiin ósirý týraly sheshiminiń arqasynda edáýir joǵary tabysty salymdarǵa ainalady. Búginnen bastap 3 jáne 6 ailyq jinaq depozitter boiynsha mólsherlemelerdiń eń joǵary máni - 14,0 paiyzdy quraidy. QDKBQ merzimdi salymdar boiynsha mólsherlemelerdiń eń joǵary mánin ózgerissiz, iaǵni, 10 naýryzda bekitilgen deńgeide qaldyrdy» dep málim etti qordyń baspasóz qyzmeti.
Alaida myna merzimdi depozitter boiynsha usynylǵan eń joǵary mólsherlemelerdi, dálirek: bir jylǵa ashylǵan depozitter boiynsha - 12,2 paiyzǵa , eki jylǵa – 12,9 paiyzǵa deiin ósirdi.
«QDKBQ áreketi naryqtyq ádistemege negizdeledi jáne birinshi kezekte qazaqstandyq salymshylardyń múddelerin qorǵaýǵa jáne salymdardy saralaýdyń negizgi qaǵidasyn saqtaýǵa baǵyttalǵan: barlyq depozitter infliatsiiadan joǵary tabys ákeledi, al merziminen buryn alýǵa qatysty eń joǵary talaptarǵa ie jinaq salymdar edáýir joǵary tabystylyq ákeledi», - dep túsindirdi Qazaqstannyń depozitterge kepildik berý qory tóraǵasynyń mindetin atqarýshy Bota Aqbaeva.
