Munaidyń qymbattaýyna qaramastan, teńge baǵamynyń álsireýi jalǵasyp keledi. Bul týraly QR Ulttyq bankiniń tóraǵasy Erbolat Dosaev aitty, dep habarlaidy QazAqparat.
«Munai baǵasynyń bir barrel úshin 84,4 AQSh dollaryna deiin 7,5%-ke ósýine qaramastan, ekonomikalyq belsendiliktiń qalpyna kelýi men fiskaldyq serpinniń jalǵasýymen qatar ulttyq valiýta bir aida bir AQSh dollary úshin 427,15 teńgege deiin 0,3%-ke álsiredi», - dedi E. Dosaev Úkimet otyrysynda.
Biznes pen halyq tarapynan suranystyń ósýi aiasynda Resei taýarlarynyń importy biylǵy 2-toqsanda jyldyq mánde 1-toqsandaǵy 2,4%-ten 36,1%-ke deiin ulǵaidy. Bul qazanda teńge baǵamynyń bir rýbl úshin 6,5 teńgege deiin nemese 3,4%-ke álsireýine alyp keldi.
«Sonymen qatar, bazalyq stavkanyń ósýi teńgedegi boryshtyq quraldardyń tartymdylyǵyn saqtaidy, oǵan beirezidentterdiń qazanda Qazaqstan Respýblikasynda memlekettik baǵaly qaǵazdarǵa salymdarynyń 863 mlrd teńgege deiin 75 mlrd teńgege ósýi dálel bolady. Sheteldik investorlar tarapynan shetel valiýtasynyń qosymsha usynysy naryqtyń ótimdiligin jaqsartýǵa jáne suranysty ishinara qanaǵattandyrýǵa yqpal etedi», - dedi Ulttyq bank tóraǵasy.
Onyń aitýynsha, importtyń ósýi aiasynda valiýtaǵa ornyqty suranys, onyń shekteýli usynysy jáne syrtqy naryqtardaǵy qubylmalylyǵy teńge baǵamyna qysym jasaýdy jalǵastyrady.
