Bilim jáne ǵylym vitse-ministri Ashat Aimaǵambetov balabaqshalarda qaýipsizdik qalai qamtamasyz etilip jatqanyn aitty, dep habarlaidy Sputnik Qazaqstan.
"Shynymen de problema bar. Biz balalardyń qaýipsizdigine áser etetin sharalardy usynyp otyrmyz. Bilim berý uiymdaryn qural-jabdyqtarmen qamtamasyz etý normativterine qatysty buiryqqa ózgerister engizý máselesin kóterdik. Barlyq balabaqshany, sonyń ishinde oqý baǵdarlamasy ótetin bólmelerdi mindetti túrde beinebaqylaýmen qamtamasyz etýdi kózdep otyrmyz", — dedi A.Aimaǵambetov.
Onyń aitýynsha, keibir balabaqshalarda bul júie burynnan bar, mundai mekemelerde ata-analar aýditoriiada bolyp jatqan oqiǵany qashyqtan baqylai alady.
Esterińizge sala keteiik, taiaýda balabaqsha tárbieshisi jylaǵan balany kórpemen tunshyqtyryp jatqany túsirilgen video jariialanyp, áleýmettik jelini dúrliktirgen bolatyn. Oqiǵa Qaraǵandy oblysynyń Temirtaý qalasynda bolǵan.
Oblystyq ishki ister departamenti habarlaǵandai, videony ekinshi tárbieshi biyl mamyr aiynda túsirgen, alaida tek taiaýda ǵana jariia bolǵan. 50 jastaǵy tárbieshi balanyń til almai qoiyp, tósekte sekirgenin aityp aqtaldy.
