Qaraǵandy oblysyndaǵy Temirtaýda ótken ekologiialyq jaǵdai týraly keńeitilgen otyrysta kásiporyndardan shyǵatyn qaldyqtardy aýa raiyna qarai rettep otyrý máselesi kóterildi, dep habarlaidy "Ult aqparat" oblys ákiminiń baspasóz qyzmetine silteme jasap.
«Men buryn ónerkásip oryndarynda jumys istedim. Ol kezde qaldyqtardy shyǵarý kólemi aýa raiyna qarai retteletin. Jel baiaý kezde óndiris qýaty 15-20 paiyzǵa tómendetiletin. Qazir bul tártip bar ma?», - dedi Qaraǵandy oblysynyń ákimi Erlan Qoshanov.
Buryn atalǵan túiitkilmen Kazgidromet ainalysatyn. Qazir jaǵymsyz meteojaǵdai bar, al osyǵan orai zańdy turǵyda óndiris kólemin retteý máselesi qarastyrylmaidy.
«Jaǵymsyz meteojaǵdaidy kásiporyndar da memlekettik quzyretti organdar da kózge ilip otyrǵan joq. Men búgin saitqa kirdim. Ol jerde Qaraǵandyda 24 qańtar kúni aýa lastanýyna ákep soǵatyn jaǵymsyz meteo jaǵdai dep jazylǵan. Endi qarańyzdar, aqparat joq emes bar, biraq oǵan eshkim de nazar aýdaryp otyrǵan joq», - dedi «EkoMýzei» mekemesiniń direktory Dmitrii Kalmykov.
Jergilikti Ekologiia departamentiniń derekterine súiensek, 2017 jyly atmsferaǵa shyǵarylǵan ziiandy qaldyqtardyń kólemi 290 myń tonnany quraǵan. Onyń basym bóligi, 221 myń tonna, iaǵni 77 paiyzy «ArselorMittal Temirtaýǵa» tiesili.
Erlan Qoshanov kompaniia ókilderine, sonymen birge Temirtaý qalasynyń ákimdigine qorshaǵan ortanyń jaǵdaiy boiynsha qoǵamdyq monitoring uiymdastyrý jóninde tapsyrma berdi.
Eske sala keteiik, qańtardyń basynda áleýmettik jeliler arqyly Temirtaýdaǵy qardyń qaraiyp ketkeni týraly aqparat taraǵan. Temirtaýlyqtan osyǵan bailanysty belsendi toptarǵa birigip, máseleniń mánisin anyqtaýdy talap etken bolatyn. Temirtaý qalasy ákiminen qalaǵa jaýǵan qardyń beti áp-sátte qaraiyp ketýine bailanysty ekologiia departamentine hat joldandy. Sondai-aq bul máseleni anyqtaý úshin arnaiy jumys toby da quryldy.
