48 jastaǵy er adam geroin satqany úshin 6 jylǵa bas bostandyǵynan aiyryldy, dep habarlaidy "Ult aqparat" kóliktegi politsiia departamentine silteme jasap.
25 aqpanda jelilik politsiia basqarmasyna belgisiz er adamnyń Almaty-1 temirjol vokzalynyń aýmaǵynda geroin satýmen ainalysatyny týraly aqparat kelip tústi. Bul týraly kóliktegi politsiia departamenti bastyǵynyń orynbasary Nurjan Alibaev aitty.
Onyń aitýynsha, kólik politseileri jedel-izdestirý barysynda Almaty qalasynyń 48 jastaǵy turǵynyn ustaǵan.
«Sot-himiialyq saraptama qorytyndysyna sáikes kúdiktiden tárkilengen zat jalpy salmaǵy 0,15 grammdy quraityn geroin bolyp shyqty. Atalǵan fakti boiynsha QR QK 297-babynyń 1-bóligimen sotqa deiingi tergeý júrgizildi», - deidi politsiia polkovnigi.
Almaty qalasy Túrksib aýdandyq sotynyń úkimimen joǵaryda atalǵan quqyqbuzýshy qylmys jasaǵany úshin kináli dep tanylyp, oǵan 6 jylǵa bas bostandyǵynan aiyrý jazasy taǵaiyndaldy.
Jyl basynan beri kólik politseileri esirtki ainalymyna bailanysty 403 quqyq buzýshylyqty anyqtady, onyń ishinde 28 ótkizý faktisi, 18 asa iri mólsherde saqtaý faktisi jáne 4 kontrabanda faktisi bar.
Zańsyz ainalymnan 158 keliden asa túrli esirtki quraldary tárkilendi.
