«Eski problemalardyń jańa sheshimin usynǵan Prezident». Asylbek Abdýlov «Prezident Toqaevtyń jańa baǵdary» atty filminde Memleket basshysynyń jeki jyldyq jumysyna osyndai baǵa beredi, dep habarlaidy QazAqparat.
«Táýelsiz Qazaqstannyń ekinshi prezidenti Qasym-Jomart Toqaev eldi qysyltaiań jaǵdaida basqara otyryp, eki jyl ishinde qatal synaqtan ótti. Mundai oqiǵalar men dramaǵa toly eki jyl qalypty tórt jylǵa teń edi», - deidi jýrnalist.
Filmniń basym bóligi elde bilik tranziti bolyp jatqan kezde tirkelgen tosyn oqiǵalardy sipattaýǵa arnalǵan.
«Qazaqstannyń jańa Prezidenti sailaýdaǵy senimdi jeńistiń qýanyshyn sezinip úlgermei jatyp, áleýmettik-saiasi syn-tegeýrinderge tap boldy. «2019 jyldyń maýsym aiynyń sońynda bolǵan Teńiz» munai ken ornyndaǵy eńbek qaqtyǵysy birlesken kásiporyndaǵy sheteldik jáne jergilikti mamandardyń ártúrli eńbek jaǵdaiynda jumys istegeninen, ádiletsiz eńbek tóleminen týyndady. Qasym-Jomart Toqaev eski problemalardy sheshýdiń jańa joldaryn usyndy», - dep eske alady film avtory.
Rasymen, sol oqiǵadan keiin sheteldik eńbek migranttaryna beriletin kvota sany 40 paiyzǵa azaitylǵan bolatyn.
Filmde Memleket basshysynyń Arys qalasyna baryp, jergilikti turǵyndarmen áńgimelesken sátteri de berilgen.
«Qazaqstannyń jańa Prezidenti úshin 2019 jylǵy maýsymda Arys qalasyndaǵy áskeri qoimalardaǵy oq-dárilerdiń jarylysy jalyndy synaq boldy. Bul on jyldaǵy tórtinshi jaǵdai edi», - delingen filmde.
Jambyl oblysynyń Qordai aýdanyndaǵy shielenisti oqiǵalar da avtordyń nazarynan tys qalmaǵan.
«Sailaýdan keiin Qasym-Jomart Toqaev óziniń Prezidenttik kún tártibine birden enip kete almady. Synaqtar birinen soń biri shyǵyp jatty. Sóitip júrip kún tártibine koronavirýs pandemiiasy shyqty. Kóptegen jobalar artta qaldy. Prezident Toqaevtyń aldynda qazaqstandyqtardy COVID-19-dan, al memleketti ekonomikalyq daǵdarystan qutqarý jáne saqtaý mindeti turdy», - deidi Asylbek Abdýlov.
Sondai-aq, ol Qasym-Jomart Toqaevtyń Dimash Qudaibergen, Imanbek Zeikenov, Aisultan Seiitov, Nurlan Sabýrov siiaqty jáne daryndy jas qazaqstandyqtarǵa syrttai demeý bolyp júrgenin ataidy.
«Koronavirýs pandemiiasy Qazaqstanǵa bilik aýysyp bolyp, saiasi reformalar kún tártibine shyqqan kezde keldi. Biraq pandemiia mundai mańyzdy iske kedergi bolǵan joq. Prezident Toqaev aitqandai, aýqymdy saiasi reformalar jalǵasyp jatyr. Qasym-Jomart Toqaev tiimdi daǵdarys menedjeri men reformatordyń qasietterin sátti úilestirip keledi», - dep túiindedi Asylbek Abdýlov.
