Aqparat jáne kommýnikatsiialar ministrligi Telegram messendjeriniń buǵattalýyna múddeli emes. Bul týraly vedomstvo basshysy Dáýren Abaev málimdedi, - dep habarlaidy Tengrinews.kz tilshisi.
"Aqparat jáne kommýnikatsiialar ministrligi sottyń sheshimin oryndaý úshin barlyq qajetti sharany qabyldaýǵa mindetti. Osyǵan bailanysty Telegram ákimshiligine habarlamalar jiberildi. Osy baǵytta jumys istep jatyrmyz. Qazaqstanda Telegram siiaqty tanymaldylyqqa ie bolyp jatqan messendjerdiń buǵattalǵanyna múddeli emespiz", - dedi ministr Dáýren Abaev.
Eske sala keteiik, osyǵan deiin Qazaqstan biligindegilerdiń Qazaqstan aýmaǵynda Telegram messendjerin buǵattaýy múmkin ekeni aitylǵan edi. Sottaǵylardyń messendjer kanaldarynan "Qazaqstannyń demokratiialyq tańdaýy" qozǵalysynyń materialdaryn óshirý týraly sheshimi oryndalmasa elimizde Telegram messendjeri buǵattalýy múmkin.
