«Qazaqstan» ulttyq arnasynda ótken teledebatta sailaýǵa túsetin bes saiasi partiianyń músheleri óz jaqtastary naqty qandai máselelerdi sheshýdi kózdep otyrǵanyn aityp berdi, dep habarlaidy QazAqparat.
Teledebatta sóz bastaǵan «Aýyl» partiiasynyń múshesi Dáýletkerei Kápuly áleýmettik nemese ekonomikalyq máselelerdi emes, eń aldymen ideologiianyń qalai bolatynyn aiqyndap alý kerektigin atap ótti. Onyń aitýynsha, ulttyq ideologiia durys jolǵa qoiylmai, elimizdiń damý strategiiasy júzege asyrylmaidy. Jalpy «Aýyl» partiiasy ulttyq ideologiianyń tujyrymdamasyn daiyndap qoiǵan. Ol tujyrymdamany ziialy qaýym ókilderi, ult janashyrlary talqylap, daiyn qujat Parlamentke joldanbaq. Sonymen qatar «Aýyl» partiiasy jerdi satýdy jáne sheteldikterge jalǵa berýdi túbirimen toqtatyp, muny zańmen shegeleýdi josparlaýda.
Al ekinshi bolyp sóz alǵan «Nur Otan» partiiasynyń ókili Aidos Sarymnyń atap ótýinshe, qazir el qiyn-qystaý kezeńde, Qazaqstan úlken reformalar aldynda tur. Elimizdi, álemdi pandemiia jailap jatyr. Osynyń bárin eskere kele, árbir esti ári oily azamat eliniń bolashaǵyn, memlekettiń turaqtylyǵyn oilaýy kerek. «Nur Otan» partiiasynyń múshesi tarih bizge taǵy ýaqyt bere me degen úlken másele baryn aitady. Sózinshe, halyq qazir kóptegen máselege narazy bolýy yqtimal. Biraq ainalyp kelgende el de, memleket te - bireý. Aidos Sarymnyń paiymdaýynsha, muny elimizdiń eshbir azamaty esten shyǵarmaýy kerek. Urpaqtyń basty mindeti – ózimizden keiingi býynǵa babadan qalǵan jerdi amanattaý, táýelsiz memlekettiń tizginin berý.
Osydan keiin «Aq jol» partiiasynyń atynan Berik Dúisenbinov sóiledi. Onyń sózinshe, «Aq jol» partiiasynyń maqsaty Alash ideiasymen úndes. Partiia múshesi ult kósemi Álihan Bókeihannyń «Memlekettigi joq ult jetim» degen sózin mysalǵa keltirdi. Sondyqtan «Aq jol» partiiasynyń músheleri táýelsizdikti basty bailyq dep tanyp, qazaq jeriniń árbir tasy ár qazaqtyń keýdesine túime bolyp qadalýy kerektigin jumysynyń basty baǵdary etpek. Berik Dúisenbinovtiń sózinshe, qazaq basqa elderden kem bolmaýy úshin bilimdi, bai ári myqty bolýy tiis. Partiianyń ókili sonymen qatar ekonomikalyq táýelsizdikke qol jetkizý – basty mindetterdiń biri ekenin aityp ótti. Budan bólek «Aq jol» partiiasy ekonomikany nyǵaitý úshin birqatar shara usynbaq.
Qazaqstan halyq partiiasy atynan teledebatqa Ǵaziz Qulahmetov qatysty. Onyń sózinshe QHP – halyq problemalaryn, jer máselesin, qoǵamdyq ótkir máselelerdi jii qozǵap júrgen saiasi partiia. Partiia ókili óz jaqtastarynyń ideialarynyń negizinde qarapaiym bastamalar jatqanyn baian etti. Onyń aitýynsha, QHP halyqtyń bilimi men densaýlyǵy, baspana muqtajdyǵy, azyq-túlik qaýipsizdigi, zeinetkerlik jasty 60 jasqa (erlerdiń) deiin tómendetý, lokdaýnnan zardap shekken kásipkerlerge birrettik nesie raqymshylyǵyn jasaý, jer bailyǵyn berekesiz paidalanýdy toqtatý, memlekettik apparatty reformalaý, halyqtyń rýhani murasyn jańǵyrtý bastamalaryn qolǵa alady. Osylaisha, Qazaqstan halyq partiiasy osy baǵdarlamada kórsetilgen barlyq bastamany bar kúsh-jigerimen oryndaýdy kózdeidi.
Partiia ókilderiniń ishinde sońǵy bolyp sóz alǵan «Adal» partiiasynyń múshesi Maqsat Tolyqbai birinshi kezekte Meditsinalyq áleýmettik qordy tarqatý kerektigin jetkizdi. Onyń aitýynsha, bul elde meditsina tegin bolýy tiis. Sonymen qatar «Adal» partiiasynyń músheleri memlekettik qyzmetkerlerdiń ortasha jalaqysyn keminde 200 myń teńgege kóterýdi, stýdentterdiń shákirtaqysyn eń tómengi jalaqymen teńestirýdi, al eń tómengi jalaqynyń shegin 60 myń teńgege jetkizýdi kózdeýde. Sonymen qatar Maqsat Tolyqbai aýyldaǵy jastardyń jumyssyz júrgeni – úlken problema ekenin atap ótti. Partiia kásipkerlerge arnalǵan nesieni 6 paiyzǵa deiin túsirip, ony kepilsiz qylýdy másele etip kóterýde. Odan bólek Maqsat Tolyqbai aýylda jer kóp bolǵanymen, mal jaiatyn jer joqtyǵyn da ózekti problema dep atady. Sol úshin «Adal» partiiasynyń músheleri jerdi bólý máselesin tsifrlyq formatqa aýystyrý kerek dep sanaidy.
