Telearna reitingin ýniversitet ǵalymdary, saliqaly ári tájiribeli adamdar baǵalaý kerek. Bul týraly L. N. Gýmilev atyndaǵy Eýraziia ulttyq ýniversitetiniń rektory Erlan Sydyqov málim etti, dep habarlaidy QazAqparat.
«Qazir jýrnalistika tili jutańdap ketti, burmalaýshylyqqa ainalyp barady. Halyq, ásirese jastar durys sóileý men saýatty jazýdy aqparat quraldarynan úirenedi. Qazaqtildi aýditoriia keńeigen saiyn qazaqtildi jýrnalistika óz mindetine jaýapty qaraýy kerek. Ókinishke qarai, emlelik, orfografiialyq, stildik qateler kópten kezdesýde. Ár jýrnalistiń aldynda «Orfografiialyq sózdik» jatýy qajet», - dedi E. Sydyqov onlain-formatta «Qazaqstan Respýblikasyndaǵy jýrnalistika deńgeii» taqyrybynda ótken talqylaý barysynda.
Sonymen qatar rektor otandyq jýrnalistika ǵylymy máselesine toqtaldy.
«Halyq narazylyǵyn týdyrǵan, ulttyq dúnietanymǵa jat keibir baǵdarlamalardyń telearna reitinginde joǵary orynǵa ie bolyp otyrǵany neni bildiredi? Tereń mazmuny joq baǵdarlamalar kórermenderdi kóptep jinap jatady. Damyǵan elderde telearna reitingin ýniversitet ǵalymdary, saliqaly ári tájiribeli adamdar baǵalaidy. Osy azamattar belgilese, ár baǵdarlamanyń reitingi naqty bolady dep oilaimyn», - dedi Erlan Sydyqov.
Onyń paiymynsha, bul turǵyda ǵylymi taldaý, kásibi saraptama kerek.
