Kisi óltirý, qaraqshylyq jáne esirtki saýdasy úshin sottalǵan 6 adam abaqtydaǵy tintý sharalaryna narazylyq retinde óz-ózderin jaraqattaǵan. Bul týraly Qylmystyq-atqarý júiesi komitetiniń baspasóz qyzmetinen málim etti, dep habarlaidy "Ult aqparat".
«Túrkistan oblysynda sottalǵan 6 azamat barshanyń kózinshe óz denelerin bolymsyz deńgeide keskiledi. Munyń sebebin olar tintý jumystarymen jáne qaýipsizdik mekemesiniń ishki tártibimen kelispegendikten dep túsindirdi. Tintý sharalary Ulttyq ulannyń, ózindik qaýipsizdik qyzmetiniń, prokýratýra ókilderiniń jáne oblystyq Qylmystyq-atqarý júiesi departamenti basshylyǵynyń qatysýymen ótken bolatyn», - dep jazady komitettiń baspasóz qyzmeti.
Tintý qorytyndysynda paidalanýǵa tyiym salynǵan zattar tabylyp, tárkilengen.
«Qatań tártipte jazasyn ótep jatqan birneshe sottalǵan adam qylmystyq-atqarý júiesi qyzmetkerleriniń zańdy talaptaryna beiádep sózben narazylyq bildirip, ózderine qasaqana dene jaraqatyn saldy. Olarǵa dereý meditsinalyq kómek kórsetildi. Qazir jaǵdailary qanaǵattanarlyq, aýrýhanaǵa jatqyzýdy qajet etpeidi», - deidi Túrkistan oblysy boiynsha Qylmystyq-atqarý júiesi departamentiniń bastyǵy Talǵat Ábdiranbaev.
Sondai-aq, departament bastyǵy ózerine qol salǵandardyń kisi óltirý, qaraqshylyq jáne esirtki saýdasy úshin jazasyn ótep jatqanyn atap ótti.
Qarsylyq sharasynyń bastamashysy Qylmystyq kodekstiń 297-baby 3-bóligi 1, 3-tarmaǵy (esirtki quraldaryn zańsyz saqtaý, daiyndaý jáne ótkizý) boiynsha 10 jylǵa sottalǵan 28 jastaǵy azamat ekeni belgili boldy.
«Mán-jaidy anyqtaý úshin oqiǵa ornyna jedel-tergeý toby keldi. Atalǵan fakti tirkelip, qyzmettik tergeý júrgizilýde. Qazir ICh-167/9 qaýipsizdigi barynsha joǵary mekemede aýyr jáne asa aýyr qylmystar jasaǵany úshin 485 sottalǵan ustalady», - dep jazylǵan departamenttiń dereginde.
