Foto: jcomp/Freepik
Jetisý oblysynyń prokýratýrasy 9 balalar lageriniń qyzmetine tekserý júrgizdi, olardyń jaǵdaiy zań talaptaryna sáikes kelmedi, - dep habarlaidy "Ult aqparat" vedomstvonyń baspasóz qyzmetine silteme jasap.
Mysaly, «Qarlyǵash» lagerinde (Kóksý aýdany) sanitarlyq-epidemiologiialyq normalarǵa qaishy, balalarǵa arnalǵan azyq-túlik veterinariialyq-sanitarlyq saraptama jáne qaýipsizdik sertifikattarynsyz satyp alynǵan. Sondai-aq balalarǵa arnalǵan kúndelikti tamaqtaný normalary saqtalmaǵan. As mázirinde jańa pisken kókónisterden jasalǵan taǵamdar qarastyrylmaǵan.
"Lagerlerdiń barlyǵynda derlik órt qaýipsizdigi normalary saqtalmaidy. Alǵashqy órt sóndirý quraldary - órt sóndirgishter men órt gidranttary joq, odan bólek órt kezinde evakýatsiialyq joldardyń kedergisiz shyǵýy qamtamasyz etilmegen.
Al keibir lagerlerde merzimi ótken dári-dármekter saqtalǵan.
Balalardyń lagerlerde turýy men bos ýaqytyn ótkizý jaǵdaiy da tehnikalyq normalar men qaýipsizdik talaptaryna sáikes kelmeidi. Negizgi (ǵimarattar, úiler) jáne qosalqy (as úi, jýynatyn bólmeler jáne t.b.) ǵimarattary tozǵan, kúrdeli jóndeýdi qajet etedi.
«Shaǵala» lagerinde (Alakól aýdany) oiyn-saýyqtyrý keshenderi múldem joq.
Sonymen qatar Tekeli qalasyndaǵy lagerlerdiń birinde «Paranoidty shizofreniia» diagnozymen esepte turǵan meditsina qyzmetkeri anyqtaldy" - delingen habarlamada.
Vedomstvo málimetinshe, tekserý is-sharalary jalǵasyp jatyr. Barlyq anyqtalǵan buzýshylyqtar boiynsha prokýrorlyq qadaǵalaý sharalary qabyldanady.
