Kórneki sýret: pixabay
Jetisý oblysy Tekeli qalasyndaǵy mektepterdiń birinde 7-synyp oqýshylaryna eresekterge arnalǵan býkletter taratylǵan. Oqý ornynda psiholog balalarǵa býlling, kiberbýlling taqyrybyn túsindirý boiynsha jumys júrgizgen, - dep habarlaidy Tengrinews.kz saity.
Oqiǵa Tekeli qalasynyń №8 mektebinde bolǵan. Ata-analar 7-synyp oqýshylaryna taratylǵan býkletterge shaǵymdanǵan. Jelide sýretter tarap, ol halyqtyń narazylyǵyn týǵyzǵan. Bul tipti eresekter úshin ersi kóringen.
"Qandai klient týraly áńgime bolyp jatyr?", "Klient, jumys... bul ne? Jezókshelerge kómek pe, álde ne?" - dep ashýlanǵan Jeli qoldanýshylary.
Jetisý oblysy bilim basqarmasy málimetinshe, 7-9 synyp oqýshylarymen jumys júrgizilip, "Býlling" jáne "Kiberbýlling" taqyrybynda beinerolikter kórsetilgen. Sabaq barysynda psiholog "qate" býkletter taratqan.
"Quqyqtyq apta aiasynda Tekeli qalasynyń №8 mektebinde 7-9 synyp oqýshylary men kámeletke tolmaǵandar jáne olardyń quqyqtaryn qorǵaý jónindegi komissiia hatshysynyń, qalalyq aýrýhana psihologynyń kezdesýi ótti. Qalalyq aýrýhananyń psiholog-dárigeri JITS ortalyǵy bekitken býkletterdi taratqan kezde basqa jas toptaryndaǵy naýqastarǵa arnalǵan býkletterdi qate taratqan. Osy jaǵdaidan keiin qalalyq aýrýhana ákimshiligi mektep basshylyǵymen birlesip, ata-analarmen kezdesý ótkizip, keshirim surady", - dep túsindirdi basqarma ókili.
