Foto: "Astana Arýy" uiymdastyrýshylarynan
Elordada «Astana arýy-2024» sulýlyq baiqaýy irikteýiniń barlyq kezeńinen ótken, qalanyń eń sulý qyzy ataǵyna talasýǵa daiyn 14 finalist tanystyryldy. Jeńimpaz osy qarasha aiynda ótetin «Qazaqstan arýy» finalynda Astananyń atynan baq synaidy, dep habarlaidy Ult.kz.
Osy jyly «Qazaqstan arýy» baiqaýynyń jańa maýsymy The art of being a woman («Áiel bolý – óner») degen taqyryppen ótedi, sondyqtan «Astana arýy» saiysy da biyl kútpegen jańa deńgeige kóterildi. Baiqaý qatysýshylardyń syrtqy sulýlyǵyn saralaýmen shektelmeidi, ol tereń aspektilerge baǵyttalǵan. Atap aitqanda, qyz-kelinshekterdiń qoǵamdaǵy jáne ártúrli salalardaǵy róli, olardyń ózin-ózi tanytýy jáne tulǵalyq damýǵa degen umtylysy da baǵalanady.
«Qazaqstan arýy» PR direktory Gúlim Sovetqan baiqaýǵa qazirgi zaman talabyna sai ózgeristerdi engizip jatqandaryn aitady.
"Birinshi kezekte qyzdardyń tulǵalyq damýyn baǵalaimyz. Olardyń jan-jaqty damýyna qaraimyz. Qatysýshylardyń bári kásibi maman retinde ózderin damytqan jandar. Sportta, ónerde, bilim salasynda eleýli jetistikteri bar. Jáne osy qyzdardyń talantyn odan ári damytýǵa sep bolatyn orta qurýdamyz. Qyzdardyń tek sulý bolýy jetkiliksiz. Olar bastysy bilimdi bolýy shart. Biz qundylyqtyń bárin boiyna sińirgen jandardy tańdap aldyq", -deidi ol.
Foto: "Astana Arýy" uiymdastyrýshylarynan
Baiqaýdyń jańa kontseptsiiasy áielder arasyndaǵy yntymaqtastyq pen qamqorlyqty nasihattap, «kúsh birlikte» ekenin negizge alǵan. Táj ben eloradanyń eń sulý qyzy ataǵy úshin baq synaityn qatysýshylardyń árqaisysy jeńis tuǵyrynda ǵana jarqyrap qoimai, qoǵamdy jaqsy jaǵynan ózgertýdi, basqalarǵa shabyt syilaýdy, mańyzdy áleýmettik bastamalardy damytýǵa úles qosýdy maqsat etedi.
Telejúrgizýshi, jýrnalist Gúlmira Dairabaeva osyndai baiqaýlardyń bolǵany jaqsy degen oida.
"Beibit ómir ádemiliktiń, meiirimdiliktiń kórinisi. Sondyqtan osyndai baiqaýlardyń bolǵany jaqsy. Mysaly, men ózim 1990 jyldary baiqaýǵa qatysqanda 5 til biletin edim. Ol kezde ol múmkin emes dúnie bolyp kórinetin. Al qazir kóp jastarymyz osy baiqaýǵa qatysqan qyzdar 5 tilde emin-erkin sóileidi. Iaǵni úirenshikti dúniege ainaldy. Elimizdi órkendetý úshin árine biz bilimdi bolýymyz qajet. Mundai baiqaýlar arqyly qyzdarymyz ádemi ári bilimdi bolýǵa umtylady", - deidi Gúlmira Dairabaeva.
Foto: "Astana Arýy" uiymdastyrýshylarynan
Eske salaiyq, 18 qazanda Miýzik Hollda «Astana arýy – 2024» sulýlyq baiqaýynyń finaly ótedi. Jeńimpaz sol kezde anyqtalady. Biyl finalda kórermenderdi qatysýshylardyń erekshe qoiylymdarymen qatar, baiqaýdyń basty missiiasy árbir názik jandy qoǵamnyń damýyna úles qosýǵa jáne basqalarǵa úlgi bolýǵa qabiletti ekenin kórsetýmen tańǵaldyrady.
Daiyndaǵan: Qalamqas Nysanbai
