QR prezidenti Nursultan Nazarbaevtyń tapsyrmasyn úkimet músheleri alǵashqy kúnnen bastap oryndady. Ádette bir-eki sózin qazaq tilinde bastap, odan ári oryssha sýdyrata jóneletin ministrler búgin baiandamasyn bastan-aiaq qazaqsha jasady. Desek te úirenshikti ádetine basyp, sóz arasynda oryssha sóilep qoiǵan sheneýnikter de boldy, dep habarlaidy Sputnik Qazaqstan tilshisi.
Úkimettiń búgingi otyrysynda úsh másele qaraldy: investitsiia tartý máseleleri, orta bilim berý uiymdarynda jańartylǵan mazmunǵa kóshý, Aqtóbe aglomeratsiiasyn aýmaqtyq damytýdyń óńiraralyq shemasy.
Alǵash bolyp investitsiialar jáne damý ministri Jeńis Qasymbek sóz aldy. Ministr investitsiia tartýǵa qatysty baiandamasyn bastan-aiaq qazaq tilinde jasady. Odan keiin minberge shyqqan energetika ministri Qanat Bozymbaev ta prezidenttiń sózin jerge tastamaitynyn kórsetti.
Aýyl sharýashylyǵy vitse-ministri Arman Evniev, "Báiterek" holdingi, "Qazaqinvest" kompaniiasynyń basshylary da qazaq tilinde sóiledi.
Kezek óńirlerge kelgende, Aqmola oblysynyń ákimi Málik Myrzalin taza qazaq tilinde ótip kele jatqan otyrystyń "shyrqyn buzdy". Basyn qazaq tilinde bastap, keiin oryssha sairai ketti. Bálkim prezidenttiń keshegi aitqan sózi depýtattar men ministrlerge ǵana qatysty dedi me eken, joq álde esinen shyǵardy ma, kim bilsin?!
Kún tártibindegi ekinshi máselege qatysty baiandama jasaǵan bilim jáne ǵylym ministri Erlan Saǵadiev te Elbasynyń tapsyrmasyn oryndamady. "Aýrý qalsa da, ádet qalmaidy" degen osy bolar, ministr myrza ara-tura oryssha sóilep qoidy.
Bir qyzyǵy, úkimet basshysy Baqytjan Saǵyntaev bul joly spikerlerge suraq qoiǵan joq, tek qorytyndy jasap, tiisti tapsyrma berdi. Álde qaramaǵyndaǵy qyzmetkerlerin uiatqa qaldyrǵysy kelmedi me, kim bilsin?!
