Iran biligi Natanzdaǵy iadrolyq kásiporynda bolǵan oqiǵany "terakt" dep atady.
Ázirge jerasty iadrolyq nysanynda elektr energiiasyn sóndirgenin eshkim moiyndamady. Associated Press agenttiginiń jazýynsha, Iran taraby Izraildiń arnaiy qyzmetinen kúdiktengen. Izrail aqparat quraldary Natanzdaǵy aqaý jaily bir-birine uqsas habar taratqan.
Eger oqiǵaǵa Izraildiń qatysy bary dáleldense, eki el arasyndaǵy qatynas ýshyǵa túspek.
Jeksenbi kúni Pentagon basshysy Lloid Ostindi qabyldaǵan Izrail premer-ministri Biniamin Netaniahý Izrail iadrolyq kelisimniń qalpyna kelýine jol bermeidi dep málimdegen.
Associated Press agenttiginiń jazýynsha, jeksenbi kúni tańerteń bolǵan oqiǵa jaily málimet az. Buryn Iran syrtqy ister ministrligin basqarǵan Irannyń atom energiiasy jónindegi uiymnyń jetekshisi Áli Ákbar Salehi oqiǵany aiyptai sóilep, qatty-qatty sózder aitqan. Salehi naqty ne bolǵanyn túsindirmegen, biraq sózine qarap Natanzdaǵy zaýytta iri aqaý bolǵanyn ańǵarýǵa bolady.
Izraildiń Jerusalem Post basylymy buǵan deiin de Natanzdaǵy iadrolyq nysandardyń kibershabýylǵa ushyraǵanyn eske salady. 2010 jyly Izrail men AQSh-tyń StuxNet virýstyq baǵdarlamasynyń kómegimen júrgizgen birlesken operatsiiasynyń saldarynan myńnan astam tsentrifýga isten shyqqan.
Byltyr shilde aiynda Natanzdaǵy ýran baiytatyn kásiporynnan órt shyqqan. Tegeran ony "qasaqana jasalǵan áreket" dep atady. Alaida kinálilerdi atamady. Keiinirek Irannyń atom energiiasy jónindegi uiymnyń ókili Behrýz Kamalvandi órtke Izraildiń qatysy bar bolýy múmkin dep málimdegen.
2020 jyly qarasha aiynda Iran Izraildi ondaǵan jyl buryn Iran iadrolyq baǵdarlamasynyń negizin qalaǵan ǵalymdy óltirdi dep aiyptady.
