Qazaq rýhaniiaty, teatr jáne kino álemi orny tolmas qaiǵyǵa dýshar boldy. Muhtar Áýezov atyndaǵy qazaq ulttyq akademiialyq drama teatrynyń aktrisasy, Qazaqstannyń Eńbek sińirgen ártisi, «Parasat» jáne «Qurmet» ordenderiniń iegeri Ǵaziza Mákeshqyzy Ábdinabieva ómirden ótti, dep habarlaidy "Ult aqparat".
Qaraly habardy Ǵabit Músirepov atyndaǵy qazaq memlekettik akademiialyq balalar men jasóspirimder teatrynyń direktory Azamat Satybaldy Instagram-daǵy paraqshasynda jetkizdi.
«Sońǵy ret telefon soǵyp jyly sózderin aityp, biraz syrlasyp edik. Árdáiym aqylyn aityp júretin asyl apamyz edi. Qaitemiz endi. Ómir jalǵan degen osy. Qaiǵyra kóńil aitamyn», - dedi ol.
Qaza týraly áleýmettik jelidegi paraqshasynda rejisser Ashat Maemirov te jazba qaldyrdy.
"Ult rýhaniiatynyń aspany qara jamyldy. Qazaq teatry men kino óneriniń maqtanyshyna ainalǵan Ǵaziza Ábdinábieva dúnieden ótti. Aty jaman tajal aýrý eshkimdi aiamady. Jarty ǵasyr boiy qazaq teatrynyń tórinde shynaiylyǵymen, tabiǵi talantymen kórermenin tamsandyrǵan Qazaqstannyń eńbek sińirgen artisi, "Parasat", "Qurmet" ordenderiniń iegeri Ǵaziza Ábdinábieva – jany men júregi meiirimge toly, adaldyqty tý etken bolmysy bólek jan edi.... Sahna keńistiginde Marjandai asyl analardyń, Arý qyzdardyń beinesin somdaǵan asa talantty aktrisa, aiaýly jan dúnieden ótti. Kókirekti kerneitin ókinish... Ǵaziza Apa, asyl apam-ai..", - dep jazdy ol.
Ǵaziza Ábdinábieva 1948 jyly Qyzylorda oblysy Syrdariia aýdanynda týǵan. Qazaq ulttyq konservatoriiasynyń (burynǵy Almaty konservatoriiasy) «akterlik sheberlik» fakýltetin bitirgen.
1969 jyly Ǵ.Músiriepov atyndaǵy Qazaq memlekettik akademiialyq balalar men jasóspirimder teatryna qabyldanady. 1969-1993 jyldary osy teatrda aianbai eńbek etti. 1993 jyly M.Áýezov atyndaǵy Qazaq memlekettik akademiialyq drama teatryna akterlik bólimine aýysady.
Konservatoriianyń 4-kýrsynda oqyp júrip, 1969 jyly Ǵ.Músiriepov atyndaǵy Qazaq memlekettik akademiialyq balalar men jasóspirimder teatryna qabyldanady.
1994 jyldan bastap T.Júrgenov atyndaǵy Qazaq ulttyq óner akademiiasynda «akterlik sheberlik» mamandyǵynan dáris oqidy.
Onyń kino salasynda somdaǵan rólderi:
1977 - «Nan» – Jamal (rej. A. Tájibaev)
1982 - «Qaýyn» – bas keiipkerdiń zaiyby (rej. V. Pusyrmanov),
1990 - «Qyz jylaǵan» – Ásiia (rej. S. Narymbetov),
«Jel adam» – aýyl turǵyny,
2009 - Siz kimsiz, K myrza?» – jolserik (rej. Q. Ahmetov),
2009 - «Birjan sal» – Búrme áje (rej. D. Joljaqsynov),
2011 - «Ainalaiyn» – Sálima (rej. A. Sataev);
1996-2000 - Toǵysqan taǵdyrlar (Roza)
2001-2003 - Saransha (Margo)
2002 - Láilániń zary
2007 - Odnajdy v bagajnike - Jenshina na vokzale
2008 - Otkroite dver, ia schaste
2012-2013 - «25 km» Qarlyǵash (rej. I.Piskýnov)
2012-2013 - «Domashnie voiny» Áje (rej. A.Kiriýshenko)
2014 - Kempir» Kúlpásh (rej. E.Tursynov)
2015 - Zaýal» Áje (rej. J.Aibasov)
2015 - «Pobeg iz aýla» Tetia geroia (rej. N.Adambaev)
Osy oraida, Ult portalynyń ujymy qazaq jurtyna qadirli bolǵan teatr jáne kino aktrisasynyń mezgilsiz dúnieden ozýyna bailanysty, onyń otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
