Grýziia Jazýshylary úiinde qazaqtyń aqyny jáne oishyly Abai Qunanbaiulynyń grýzin tilinde alǵash basylyp shyqqan óleńder jinaǵynyń tusaýkeseri bolyp ótti, dep habarlaidy QR SIM baspasóz qyzmeti.
Is-sharaǵa Grýziianyń Mádeniet ministrligi men Jazýshylar odaǵynyń, ádebi toptarynyń, sondai-aq Qazaqstan elshiliginiń ókilderi qatysty.
Abai óleńderiniń aýdarmashysy, Grýziia Jazýshylar odaǵynyń tóraiymy, memlekettik syilyqtardyń laýreaty Makvala Gonashvili óz sózinde qazaq halqynyń ulttyq bolmysy, rýhy men dúnietanymyn qamtityn Abai shyǵarmashylyǵynyń jan-jaqtylyǵy men tereńdigin, onymen tanysý eki mádeniettiń ózara baiýy men halyqtardyń jaqyndasýyna qyzmet etetinin atap kórsetti.
Qazaqstan Elshiliginiń keńesshisi Gúlmira Sultanáli Abai shyǵarmashylyǵy men ideialarynyń táýelsizdik kezeńinde, elimizdi jańǵyrtý sheńberinde asa ózekti jáne úlken suranysqa ie ekendigin atap kórsetti.
Bul keshte ádebietshilerdiń nazaryna Qazaqstan men Grýziiada basylyp shyǵarylǵan Makvala Gonashvili men Ǵalym Jailybaidyń óleńder jinaqtary da usynyldy.
Grýzin jazýshylary Abai óleńderiniń grýzin tilindegi aýdarmasyna joǵary baǵa bere otyryp, eki eldiń shyǵarmashylyq qaýymdastyqtary arasyndaǵy yntymaqtastyqty jalǵastyrýdyń, onyń ishinde qazaq jáne grýzin aqyndary men jazýshylary týyndylarynyń eki tildi jinaǵyn shyǵarýdyń mańyzdylyǵyn atap ótti.
Qazaqstandyq diplomattar Grýziia Jazýshylar odaǵyna qazirgi qazaq poeziiasynyń jáne prozasy antologiialaryn syiǵa tartty.
