T.Bigeldinov atyndaǵy Áýe qorǵanysy kúshteriniń Áskeri institýt kýrsanttary ushaq basqarýdy úirendi, dep habarlaidy QazAqparat.
Aqtóbeniń «Hlebodarovka» aerodromynda Áskeri institýt kýrsanttary tájiribe jinaqtady. Barlyǵy 24 kýrsant jyl boiy alǵan teoriialyq bilimin jetildirip, emtihan tapsyrdy, dárigerlik komissiiadan ótti. Negizi áskeri aviatsiia fakýltetindegi ushý tájiribesi mamyr aiynda bastalyp, jaz boiy jalǵasady. Al aerodromda Mi-8 tikushaǵy daiyn. Baǵdarlama boiynsha kýrsant instrýktormen birge áýege kóterilip, arnaiy marshrýtpen júrip ótedi.
«Tikushaqty basqarmas buryn teoriialyq bilim alamyz. Jerde áýedegi árbir element muqiiat zerdelenedi. Sonymen qatar tótenshe jaǵdaidaǵy is-qimyl úiretiledi. Áýede usaq-túiek bolmaidy. Tishushaq áýege kóterilse bári ózgeredi. Sondyqtan ushqyshtar arasynda aspan bir baldy shegeredi degen túsinik bar. Eger jerde úzdik oqysa, áýede «jaqsy» degen baǵa alady», - dedi institýttyń oqý ortalyǵy komandiriniń orynbasary Vadim Chýbachýk.
Institýtyń kýrsanty Baýyrjan Sabyrbaev 50 saǵat áýede ushty. Onyń 20 saǵattan astamyn instrýktormen ótkizse, 30 saǵaty ózine tiesili.
«Bala kúnimnen aspanǵa kóterilýdi armandadym. Ushqyshtar týraly kóp kitap oqyp, filmder qaradym, fizika men matematikany oqydym. Osy eki pánniń mańyzdy ekenin bildim. Meniń alǵashqy nusqaýshym ákem boldy. Ol qazir zapastaǵy polkovnik», - dedi Baýyrjan Sabyrbaev.
Kýrsanttar úshin instrýktormen ótetin 20 saǵat mańyzdy. Osy ýaqyt aralyǵynda kýrsanttyń áýege jalǵyz kóterilýine bolatyny nemese bolmaityny sheshiledi.
«Tájiribede eki jaǵdai boldy. Eki jaǵdaida da kýrsantqa qosymsha saǵat berilip, sóilestik. Nátijesinde eki kýrsantty da basqa fakýltetke aýystyrýǵa týra keldi. Sebebi, áýe qatelikti keshirmeidi», - dedi oqý-aviatsiia ortalyǵynyń bastyǵy Nurbol Sálimbaev.
Áýe qorǵanysy kúshteri Áskeri institýtynyń baspasóz qyzmetinen habarlaǵandai, 24 kýrsanttyń bári emtihannan sátti ótti.
