"Boks, boks" dep júrmiz, áli. Olimpiadaǵa aialap, álpeshtep 9-10 sportshy aparamyz, jalǵyz-aq altyn alamyz. Osylai, qansha Olimpiada ótti. Tórt jyl solardy baptaimyz. "Súiektiń" mailysyn, "ettiń" jumsaǵyn ózgelerden jyryp, solardyń aýzyna tosamyz...
Al ana Amerikany qarańyzdarshy. Medali men júldesi kóp sport túrine iek artady. Biz siiaqty ózgelerden bóle-jara baptaǵan sańlaqtary birneshe altyn áperedi. Bir Felpstiń óziń Rioda 5 altyn, 1 kúmis aldy. Jalpy, júzý sportynan 16 altyn, 8 kúmis, 9 qola oljalady. Barlyǵy - 33 medal, 33! Beseý-aq emes!
Dál osy Amerika Braziliiadaǵy Olimpiadada jeńil atlektikadan 10 altyn, 9 kúmis, 8 qola enshiledi. Barlyǵy - 27 medal!
Árine, júzý sporty men jeńil atletikada birden Amerikamen "jaǵalasa" almaimyz. Máselen, jeńil atletikany alaiyq. Qysqa qashyqtyqtarda Iamaika jáne Amerikamen, alys qashyqtyqtarda Keniia jáne Efiopiiamen taitalasý múmkin emes, ázirshe. Sondyqtan jeńil atletikanyń tehnikalyq túrleri men orta qashyqtyqtarǵa meiilinshe kóńil bólip, qolǵa alýǵa bolar edi.
Sondai-aq Amerika men Qytai áli "kóz sala" qoimaǵan taǵy bir sport túri bar. Onda da sarapqa salynatyn medaldar sany - óte kóp. Ol - eskek esý sporty. Munda eýropalyqtar oiran salyp júr.
Baidarka men kanoede eskek esýden Germaniia des bermeidi. Nemister Rioda 4 altyn, 2 kúmis, 1 qola aldy. Bizdiń madiiar baýyrlarymyz da "altyn shyqqan jerdi belden qazyp" keledi. Olar Rioda 3 altyn oljalady.
Akademiialyq eskek esýde Ulybritaniianyń aidarynan jel esip tur. Rioda olar 3 altyn, 2 kúmis aldy. Nemister 2 altyn, 1 kúmis ielendi.
Osyny Sidnei Olimpiadasynan keiin de mezgep óttik, Beijiń Olimpiadasynan keiin de taldap jazdyq. Qarapaiym jýrnalisti kim tyńdasyn!? Elegen eshkim joq. Dáýlet Turlyhanov Afiny Olimpiadasynan keiin eskek esý sporttyna den qoiyp, Eýropadan bir bapker ákelmek bolǵan. Biraq bul isin júzege asyra almai, basshylyqtan ketti.
Álqissa, "boks, boks" dep, áli júrmiz. Órkenietti elder boksty baiaǵyda qoiǵan. Olar medali men júldesi kóp sport túrlerine kóp kóńil bóledi...
