Tájikstanda Kýliab qalasy meshitiniń imamy Mahmadsodik Saidov juma namaz kezinde úkimet buiryǵymen aitylýy kerek ýaǵyzdy oppozitsiialyq baǵyttaǵy saitqa jariialaǵany úshin bes jylǵa bas bostandyǵynan aiyrylǵan. Bul jóninde Kýliab aýdandyq sotynyń tóraǵasy Izatýllo Tabarzoda habarlady, dep jazady Azattyq.
Tájikstannyń memlekettik qaýipsizdik qyzmetkerleri 28 jastaǵy hatib-imamdy naýryzda ustaǵan. Aqparatqa qaraǵanda, ol "Isloh" aqparattyq saityna din isteri jónindegi komitet ázirlep jibergen ýaǵyz mátinin joldaǵan.
"1 aqpannan 4 naýryz aralyǵynda Mahmadsodik Saidov birneshe ret sait redaktory Mýhammadikbolom Sadriddinmen telefon arqyly sóilesip Facebook messendjer arqyly din isteri jónindegi komitet ázirlegen ýaǵyz mátinin jibergen. Ol sonymen birge Kýliabtaǵy jaǵdai týraly aqparat jiberip otyrǵan" dep atap ótti sýdia Tabarzoda.
"Isloh" – oppozitsiialyq baǵyttaǵy sait. Ol Tájikstanda tyiym salynǵan Islamnyń qaita jańǵyrýy partiiasyna qoldaý kórsetedi.
Saittyń bas redaktory Mýhammadikbol Sadriddin imam Mahmadsodik Saidovpen bailanysta bolǵanyn teriske shyǵardy. Onyń sózinshe, ýaǵyz mátinin jiberip otyratyn múldem basqa imam. Ol qazir bostandyqta júr. Mahmadsodik Saidov tanymal dini qyzmetker Domýllo Holmýrod Saidovtyń uly. Ákesi sot sheshimine qarsy shaǵym berýden esh paida joq deidi.
Resmi málimet boiynsha, sońǵy alty aida Kýliabtyń 6 turǵyny Islamnyń qaita jańǵyrýy partiiasymen áriptestik ornatty degen aiyppen ártúrli merzimge sottalǵan.
