Foto: Aqtóbe oblysy ákimdiginiń baspasóz qyzmeti
Aqtóbege Tájikstan Respýblikasy jóneltken gýmanitarlyq kómek keldi. Kórshi memleket ártúrli qurylys materialdary bar birneshe vagon jibergen, dep habarlady oblys ákimdiginiń baspasóz qyzmeti.
Tájikstan úkimeti tabiǵi apattan zardap shekken elimizdiń toǵyz oblysyna 50 vagon gýmanitarlyq kómek jetkizdi. Júktiń jalpy salmaǵy – 2 518 tonna.
"Aqtóbe oblysyna 9 vagon bólindi, onyń ishinde 27 360 litr aýyz sýy, 5400 dana asbest-tsement shiferi, 60 tonna shege, 70 tonna aǵash material, 240 tonna tsement bar", - dep jazylǵan habarlamada.
Bul kómek sý tasqyny saldarynan zardap shekken otbasylarǵa qoldaý retinde baǵyttalyp otyr.
Aita keteri, gýmanitarlyq kómekti qabyldaý men túsirýge áskeri qyzmetshiler jumyldyryldy.
