Tájikstan biligi osydan 20 jyl buryn óltirilgen Ahmad Shah Masýdty Ismoili Somoni ordenimen marapattady. Ahmad Shah Masýd 1992-1996 jyldary Aýǵanstannyń qorǵanys ministri bolǵan. Tájik biligi Aýǵanstannyń qastandyqpen óltirilgen burynǵy prezidenti Burhanýddin Rabbanidy da ólgen soń marapattady, dep habarlaidy Azattyq.
Tájikstan prezidenti 2 qyrkúiekte qol qoiǵan jarlyqta "Ahmad Shah Masýd pen Burhanýddin Rabbani 1993-1996 jyldary tájikter arasyndaǵy kelissózge araaǵaiyndyq jasap, Tájikstandaǵy beibitshilikke zor úles qosqany úshin marapattaldy" dep jazylǵan.
Kúmisten jasalǵan Ismoili Somoni ordeni - Tájikstannyń eń joǵary memlekettik nagradasy.
Aýǵastannyń burynǵy prezidenti Burhanýddin Rabbani 2011 jyly 11 qyrkúiekte "Taliban" qozǵalysy jibergen adamdarmen sóilesip turǵanda úiiniń aldynda óltirilgen. Rabbani Aýǵanstan biliginiń táliptermen beibit kelissózine jaýap berip, janjaldasýshy taraptardy bitistirýdi quptaǵan edi.
1992-1997 jyldary azamat soǵysyn bastan ótkergen Tájikstan Aýǵanstannyń burynǵy prezidenti "beibit ómir ornatýǵa ólsheýsiz úles qosty" dep sanaidy. Rabbani soǵystan qashqan tájikterge Aýǵanstannan ýaqytsha pana berip, kómek kórsetken edi.
Aýǵanstannyń ataqty dala qolbasshysy, burynǵy qorǵanys ministri Ahmad Shah Masýd soǵys júrip jatqan Tájikstandy ulttyq kelisimge shaqyryp, bosqyndardyń otanyna oralýyna septigin tigizgen. Ol bastapqyda sovet áskerimen, sonan soń sovetter qoldaǵan Mohammad Nadjibýlla úkimetimen soǵysqan. Ahmad Shah Masýd tálipterge de qarsy shyqty, resmi málimetke qaraǵanda, 2001 jyly "ál-Qaida" terror uiymynyń qolynan qaza bolǵan.
Tájikstannyń burynǵy aýǵan basshylaryn marapattaýy tálipterdiń Aýǵanstandaǵy bilikti qolǵa alýymen tuspa-tus keldi. Qazir negizinen tájikter turatyn Panjsher shatqaly tálipterge qarsylas kúshter shoǵyrlanǵan eń úlken aimaqqa ainalǵan.
