Tájikstan Qaýipsizdik keńesiniń otyrysy.
Tájikstan prezidenti Emomali Rahmon tájik-aýǵan shekarasyn nyǵaitý úshin rezervtegi 20 myń jaýyngerdi jumyldyrýdy tapsyrdy. Mundai tapsyrmany Rahmon 5 shildede ótken Qaýipsizdik keńesiniń otyrysynda qorǵanys ministrine berdi.
5 shildede Tájikstannyń Shekara qyzmeti Taliban sodyrlary Badahshan eldi-mekeniniń Hohon, Shikai, Nýsai, Mohimai, Shýgnon jáne Sýltan Ishkashim aýdandaryn tolyǵymen basyp alǵanyn jariialady. Badahshan aimaǵyndaǵy Tájikstan men Aýǵanstan shekarasynyń uzyndyǵy - 910 shaqyrym.
Resmi esep boiynsha, qazir 1500-den astam aýǵan áskeri tájik aýmaǵyna qashqan.
20 jyldan beri Aýǵanstanda terroristerge qarsy kúresip kelgen AQSh bastaǵan koalitsiialyq kúshter mamyr aiynan bastap áskerlerin shyǵaryp jatyr. Qurama Shtattar biligi 11 qyrkúiekke deiin áskerin Aýǵanstannan tolyq shyǵaratynyn jariialaǵan.
Osyndai jaǵdaida Taliban Aýǵanstannyń soltústigindegi Tájikstan jáne Ózbekstanmen shektesetin birneshe aýdandy basyp aldy. Sodyrlar sońǵy aida 143 aýdandy basyp alǵanyn jariialasa, Aýǵanstannyń ishki ister ministrligi bul málimetti teriske shyǵaryp otyr.
Tájik biligi Aýǵanstannan bosqyndar kóbeiýi múmkin ekenin boljasa, Ózbekstan ótken aptadan bastap áskeri jattyǵýdy bastap ketti.
