AQSh Kongresi ókilder palatasynyń spikeri Nensi Pelosidiń Taivanǵa sapary kezinde Qytaidyń áskeri jattyǵý ótkizýinen sekem alǵan aral biligi urysqa daiyndyǵyn kúsheitti. Bul týraly Reuters agenttigi habarlady, dep jazady Azattyq.
Pekin bul sapardy óziniń egemendigine nuqsan keltirý dep baǵalaitynyn málimdep, Vashingtonǵa munyń sońy jaqsylyqqa aparmaitynyn eskertti. Amerika delegatsiiasy keler qarsańynda qytai áskeri Taivan mańynda áskeri jattyǵý ótkize bastady. Jaýyngerler oq atý, desant túsirý sekildi jattyǵýlar oryndady. Seisenbi kúni Qytai armiiasy Taivan aralyn qorshap jatqan teńizdiń alty aýdanynda tórt kúndik áskeri oqý bastalǵanyn jariialady.
AQSh Kongresi delegatsiiasy Taibeige 2 tamyzda keshke keldi. Ushaqtan túsken bette Pelosi "AQSh Kongressi delegatsiiasynyń Taivanǵa sapary Amerikanyń qarqyndy damyp jatqan Taivan demokratiiasyn múltiksiz qoldaitynyn bildiredi" dep málimdedi.
Pelosi aralda eki kezdesý ótkizip úlgerdi: Taivan prezidenti Tsai Inven men jergilikti parlament vitse-spikeri Tsai Tsichanmen júzdesti. Inven Pelosige úkimet medalin tapsyrdy.
Qytai 3 tamyzdan bastap Taivanǵa tabiǵi qum eksporttaýyn doǵardy, dep habarlady eldiń saýda ministrligi. Málimette mundai sheshimniń ne sebepti qabyldanǵany aitylmady.
Tabiǵi qum shyny, beton óndirisi, jol jáne infraqurylym nysandary qurylysynda paidalanylady. Taivanǵa qumdy qurlyqtaǵy Qytaidan jetkizedi.
Buǵan qosa, Pekin araldan tsitrýs pen balyq ónimderiniń eki túrin importtaýdan ýaqytsha bas tartty, dep habarlady Reuters agenttigi qytai kedenine silteme jasai otyryp. Bunyń aldynda QHR kedeni úsh myńnan astam taivan taýaryn qurlyqtaǵy Qytaiǵa importtaýdy doǵarǵan.
Qytai biligi Taivandy óz aýmaǵy sanaidy jáne onymen qosylǵysy keletinin ashyq aitady. AQSh, BUU-daǵy elderdiń basym bóligi sekildi, Taivandy táýelsiz memleket dep eseptemeidi, biraq Qytaidyń araldy kúshpen qosyp alý nietine qarsy shyǵady.
