Foto: Assembly.kz
Májilistiń Zańnama jáne sot-quqyqtyq reforma komitetiniń tóraǵasy, depýtat Arman Qojahmetov jaqyn arada palatanyń taratylýy múmkindigine qatysty pikir bildirdi, dep habarlaidy QazAqparat agenttigi.
«Bul jaiynda Prezident (Joldaýda) aitqan bolatyn. Iaǵni, biyldyń birinshi jartysynda tiisti sheshim qabyldanatyny málim boldy. Atap aitqanda, normativtik-quqyqtyq baza daiyndaldy, sondai-aq tiisti zańdarǵa sailaýǵa qatysty túzetýler de engizildi. Sondyqtan jaqyn arada tiisti qadamdar jasalýy múmkin», - dedi Qojahmetov Májilistiń jalpy otyrysynan keiin tilshiler suraǵyna jaýap bere otyryp.
Osy oraida tilshiler depýtattan Májilistiń jańa quramyna enýi múmkindigine qatysty surady.
«AMANAT partiiasynyń múshesi ekenimdi bilesizder jáne bul máseleni partiia sheshedi. Sondyqtan partiia sezinde tizimge enetin kandidattardyń aty-jóni naqtylanady», - dedi Arman Qojahmetov.
Jaqynda buqaralyq aqparat quraldarynda 16 qańtarda Parlament Májilisi taratylýy múmkin ekeni habarlanǵan edi.
Budan buryn habarlanǵandai, 2022 jyly qyrkúiektegi Joldaýynda Memleket basshysy Qasym-Jomart Toqaev Májilisti sailaýǵa qatysty aitqan bolatyn.
«Sondyqtan Májilistiń jáne barlyq deńgeidegi máslihattardyń sailaýyn kelesi jyldyń birinshi jartysynda ótkizýdi usynamyn. Biz kópshiliktiń múddesin bildiretin depýtattardyń jańa quramyn jasaqtaimyz», - dedi Prezident.
