Atyraý qalasynda Maks Boqaev pen Talǵat Aianovtyń isi boiynsha basty sot otyrysy áli jalǵasyp jatyr. Qazirgi ýaqytta iske qatysy bar kýágerlerden jaýap alynyp, oqiǵanyń mán-jaiy anyqtalý ústinde.
Otyrystyń basynda T.Aianovtyń burynǵy áriptesi ári dosy Nurlan Mátjanov kýálik etti.
«Miting ótpes buryn Talǵattan WhatsApp arqyly 24 sáýirde Isatai-Mahambet alańynda miting ótedi degen habarlama keldi. Onda beibit sherý jerdiń sheteldikterge 25 jylǵa jalǵa berilýine qarsy ótkiziletini aityldy. Sondai-aq, habarlamada 1 mln gektar jer qytailyqtarǵa satylady degen aqparat boldy. Mitingke qatystym, alańǵa saǵat 15.00 shamasynda bardym. Men kelgende adam kóp jinalyp turdy, art jaǵynda turǵandyqtan maǵan eshteńe estilmedi», - dedi N.Mátjanov.
Sondai-aq, mitingke qatysqan Aslan Kýbyshevtan jaýap alyndy. Kýágerdiń aitýynsha, ol sherý týraly, jerdiń satylatyny jaily Facebook áleýmettik jelisinen bilgen. Ol jer halyqtiki dep sanaityndyqtan mitingke qatysqanyn aitty. «Óz urpaǵym úshin shyqtym», - dedi A.Kýbyshev. Degenmen, kýáger jer zańnamasynda naqty qandai ózgerister qarastyrylǵanyn bilmegenin jetkizdi. Jáne ol Facebook jelisinde Boqaevpen dos bolǵanyn da aita ketti.
Sot otyrysynda, sondai-aq, mitingke qatysqan Ashat Dosanov kýálik etti. Ol da sherý týraly Facebook áleýmettik jelisinen bilgenin aitty. Kýáger jerdiń qazaqstandyqtarǵa satylýyna, sheteldikterge jalǵa berilýine qarsy óz azamattyq pozitsiiasyn bildirý úshin shyqqanyn jetkizdi. Kýáger mitingte Boqaev pen Aianovty kórgenin, olardyń «jer satylmasyn, jalǵa da berilmesin» dep urandatyp jatqanyna kýá bolǵanyn aitty.
«Miting týraly Facebook áleýmettik jelisinen bildim. Men Talǵatty tanityndyqtan oǵan sherýdiń zańsyz ekenin aittym. T.Aianov maǵan bul týraly biletinin jáne jazany kóterýge daiyn ekendigin aitty. Jáne de Talǵat oǵan qatysty kóp bolsa bir shara qoldanylatynyn ǵana jetkizdi»,-dedi bergen jaýabynda kýáger Lázzat Ábinbaeva.
Otyrys barysynda T.Aianov pen qorǵaýshy tarap kýágerlerden jaýap alý qajet emes dep keiin shegine bastady. Degenmen sýdia G.Dáýleshova oqiǵanyń mán-jaiyn anyqtap, sottyń ádil sheshim shyǵarýy úshin iske qatysy bar barlyq kýágerlerden jaýap alynýy tiis dep jaýap qaiyrdy.
Aita ketý kerek, búgingi otyrysqa Qazaqstandaǵy Niderlandy elshiliginiń ókili qatysty. Degenmen, ol Atyraýǵa qandai maqsatpen kelgeni týraly baspasózben bólispedi. Baqylaýshy jýrnalisterdiń suraǵyna jaýap bermei, pikir bildirýden bas tartty.
Eske sala ketsek, M.Boqaev pen T.Aianovqa QR Qylmystyq kodeksiniń úsh baby boiynsha aiyptar taǵylýda. Atap aitsaq, olar: 174 baptyń 2 tarmaǵy, iaǵni, áleýmettik jáne ulttyq alaýyzdyq týǵyzýǵa baǵyttalǵan qasaqana is-áreketter jasaý, azamattardyń ulttyq namysy men qadir qasietine til tigizý; 274 baptyń 4 tarmaǵy, iaǵni, qoǵamdyq tártipti buzýǵa qaýip tóndiretin kópe-kórineý jalǵan aqparat taratý; 400 bap, iaǵni, zańsyz sherýlerdi uiymdastyrý, ótkizý jáne oǵan qatysý.
