Taldyqorǵanda politseilerdiń ustalǵan azamattarǵa zorlyq kórsetkeni týraly jalǵan aqparat taratý boiynsha tergeý sharalary bastaldy, dep habarlady Sputnik Qazaqstan agenttigi Almaty oblystyq politsiia departamentine silteme jasap.
Qazirgi kezde Qylmystyq kodekstiń 274-baby, 2-bóliginiń 3-tarmaǵy boiynsha (Buqaralyq aqparat quraldaryn nemese telekommýnikatsiialar jelilerin paidalana otyryp, kórineý jalǵan aqparat taratý) boiynsha sotqa deiingi tergeý sharalary bastaldy.
Jalǵan aqparattyń avtoryn anyqtaý maqsatynda qajetti tekseris sharalary qolǵa alyndy.
"Qoldanystaǵy zańnama boiynsha massmediada jalǵan aqparat taratqany úshin qylmystyq jaýapkershilik qarastyrylǵan", – deidi politseiler.
Aita keteri, buǵan deiin birqatar buqaralyq aqparat quraldarynda taldyqorǵandyq politseilerdiń ustalǵan azamattardy taiaqpen zorlap, bárin videoǵa túsirgeni týraly aqparat taraǵan bolatyn. Sol kezde jýrnalister quqyq qorǵaýshy Viktor Tenge silteme jasaǵan.
Qylmystyq kodeks boiynsha buqaralyq aqparat quraldary arqyly kórineý jalǵan aqparat taratqany úshin 3 000 AEK-ke (9 189 000 teńge) deiingi aiyppul ne sol mólsherde túzeý jumystary nemese 800 saǵatqa deiingi merzimge qoǵamdyq jumystarǵa tartý, ia bolmasa, úsh jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrýǵa jazasy qarastyrylǵan.
