Resei Prezidenti Vladimir Pýtin Taýly Qarabaqta atysty toqtatý týraly kelisim jasalǵany týraly málimdedi, dep habarlaidy TASS agenttigi.
Atalǵan málimdemege Ázerbaijan Respýblikasynyń Prezidenti Áliev, Armeniia Respýblikasynyń Premer-Ministri Pashinian jáne Resei Federatsiiasynyń Prezidenti qol qoiǵan. Onda 2020 jylǵy 10 qarashada Máskeý ýaqyty boiynsha 00 saǵat 00 minýttan bastap Taýly Qarabaq aimaǵyndaǵy atysty jáne barlyq áskeri áreketterdi tolyq toqtatý týraly kelisim jariialanǵan.
Resei Federatsiiasynyń bitimgershilik kontingenti Taýly Qarabaqtaǵy bailanys syzyǵy boiynda jáne Taýly Qarabaqty Armeniia Respýblikasymen bailanystyratyn dáliz boiynda ornalasady.
Ishki qonys aýdarýshylar men bosqyndar BUU Bosqyndar isteri jónindegi Joǵarǵy komissarynyń baqylaýymen Taýly Qarabaq aýmaǵyna jáne oǵan irgeles aýdandarǵa qaitarylady.
Eki el áskeri tutqyndar men basqa da ustalǵandarmen jáne qaza tapqandardyń máiitterin bir-birine beretin bolady.
Sonymen qatar, Resei Fedaratsiiasynyń Taýly Qarabaqqa baratyn reseilik bitimgerler Ýlianovsk-Shyǵys aerodromynda áskeri kólik ushaqtaryna otyrǵyzylýda. Bul týraly RF Qorǵanys ministrligi habarlady.
«Ýlianov-Shyǵys aerodromyna Ortalyq áskeri okrýgtiń bitimgershilik quramynyń alǵashqy bólimsheleri keldi. Bitimgershilik kontingentin jóneltý úshin Il-76 áskeri-kólik ushaqtarynyń toby aerodromǵa shoǵyrlanǵan», - dedi vedomstvoda.
Eske salsaq, 10 qazanda Armeniia men Ázerbaijan Taýly Qarabaqta atysty toqtatý týraly kelisimge kelgen bolatyn. Alaida bitimge qaramastan Taýly Qarabaqtaǵy jaǵdai shielenisip ketken edi.
