Senbi, 10 qazan kúni Taýly Qarabaqta oq atýdy toqtatý týraly kelisim kúshine engennen keiin shabýyldyń jandanǵany habarlandy. Taraptar bir-birin shabýyl jasady dep aiyptady.
9 tamyz kúni Armeniia, Ázerbaijan jáne Resei syrtqy ister ministrleri Máskeýde kezdesip, Taýly Qarabaqtaǵy atysty toqtata turý týraly kelisim jasaǵan. Kelisim 10 qazan kúni kúndizge 12.00 ýaqytynda kúshine engen. Sheshim tutqyndar men qaitys bolǵandardyń máiitimen almasý úshin gýmanitarlyq maqsatta qabyldandy. Bul iske qatysýǵa Halyqaralyq Qyzyl Krest komiteti de shaqyryldy.
Alaida 10 qazan kúni, kelisim kúshine engennen keiin eki tarapta Qarabaqta atys bolyp jatqanyn, drondar men artilleriianyń molynan qoldanylyp jatqanyn málimdedi.
Armeniia syrtqy ister ministrligi Ázerbaijandy 12.05 ýaqytynda Karahambeili deitin jerdi shabýyldady dep aiyptady.
Al Ázerbaijan syrtqy ister ministrligi armian tarabynyń málimdemesin «ótirik jáne kezekti arandatý» dep atap, Armeniiany 10 qazan kúni tańerteń Geranboi, Terter, Agdjabedi jáne Fizýli aýdandaryn atqylady dep aiyptady.
Taýly Qarabaqtaǵy qaqtyǵys 27 qyrkúiekte bastalǵan. Armeniia men Ázerbaijan shielenisti birinshi bolyp bastady dep aiyptaidy. Al Qarabaqtaǵylar eldi-mekenderdiń shabýyl astynda qalǵanyn aitady.
Armeniia áskeri jaǵdai engizip, búkilhalyqtyq mobilizatsiia jariialasa, Ázerbaijan jartylai mobilizatsiia jariialady.
Armeniia men Ázerbaijan arasyndaǵy Taýly Qarabaq daýy Sovet Odaǵy kezinen jalǵasyp keledi. 1988 jyly bastalyp, 1994 jyly aiaqtalǵan soǵys kezinde 30 myńǵa jýyq adam qaza tapty, júzdegen myń adam bosqynǵa ainaldy. Negizinen armiandar turatyn aimaq 1991 jyly Ázerbaijannan bólinip shyǵatynyn málimdedi, biraq álemniń eshqandai eli ony moiyndamady. Halyqaralyq quqyqqa sáikes, Taýly Qarabaq – Ázerbaijan jeri.
