Frantsiia senaty moiyndalmaǵan Taýly Qarabaq respýblikasynyń táýelsizdigin taný týraly rezoliýtsiia qabyldaǵannan keiin Ázerbaijan parlamenti Taýly Qarabaq boiynsha qurylǵan Minsk tobynan Frantsiiany shettetýdi surady.
25 qarashada Frantsiia parlamentiniń joǵary palatasy úkimetti separatistik aýmaqty táýelsiz respýblika retinde moiyndaýǵa shaqyratyn rezoliýtsiia qabyldaǵan edi. Rezoliýtsiianyń rekomendatsiialyq sipaty bar.
Osy aidyń basynda Armeniia Taýly Qarabaqta soǵystyń toqtaýyna yqpal etken Máskeý araaǵaiyndyq etken kelisimge qol qoiyp, sondaǵy úsh aýdandy Ázerbaijan jaǵyna qaitarýǵa kelisken.
Resei men AQSh teń tóraǵalyq etken Minsk toby jyldar boiy qaqtyǵysty retteýge kúsh salǵanmen soǵysqa birjolata núkte qoiatyn kelisim áli qabyldanbady.
Frantsýz senatorlarynyń bastamasynan keiin ázerbaijan depýtattary beisenbi kúni Minsk tobyna jetekshilik etetin Eýropadaǵy qaýipsizdik jáne yntymaqtastyq uiymyn (EQYU) Frantsiiany uiym tóraǵalyǵynan shettetýge shaqyratyn rezoliýtsiia qabyldady. Olar sonymen birge Bakýdy Frantsiiamen saiasi-ekonomikalyq qarym-qatynasty qaita qarastyrýǵa úndegen.
