Táýelsizdiktiń tól qurdastary biyl 27 jasta. Egemen elmen birge ósip kele jatqan olardyń maqsaty aiqyn, oiy azat. Kerisinshe bolýy múmkin de emes. Óitkeni 1991 jyly týǵan el azamattary bodandyqtan bostandyqqa aiaq basqan shaqta ómir esigin ashty. Al, búginde olar el úmitin arqalaǵan jastyq shaqtan, bir úidiń jaýapkershiligin arqalaǵan ana men ákege ainalyp otyr.
Táýelsizdik alǵan alǵashqy jyldary dúnie esigin ashqandardyń biri — Nursultan Myńǵyshev. Qazaqtai azat halyqtyń balasy ulttyq sportqa jaqyn. Ómirin qazaq kúresine arnaǵan balýan búginde kókpar men aýdaryspaqty da janyna serik etip júr. Qazaqstan barysynda baǵyn synaǵan sportshy táýelsiz eldiń qurdasy bolǵanyna maqtanady. Jáne jaýapkershiliginiń de az emestigin aitýda.
Nursultan Myńǵyshev, Qazaq kúresinen sport sheberi: «Elimizdiń táýelsizidigimen barlyǵy da maqtanýy kerek dep oilaimyn. Osyndai jetistikke jetip jatqanymyzdyń barlyǵy da táýelsizdiktiń arqasynda»
Qoi jyly týǵan qazaq urpaǵynyń qatary tek myqtylarmen tolysqandai. Biri el namysyn qorǵap júrgen sportshy bolsa, endi biri eldiń úni, qulaǵy hám tiline ainalǵan jýrnalister. Osyndai tórtinshi bilik ókilderiniń biri — Móldir Bekeeva. «Nur Otan» partiiasy men «Jýrnalister odaǵynyń» músheligine engen áriptesimiz azat eldiń berip jatqan múmkindikteriniń mol ekenin aitýda.
Al, ulttyq aspabymyz dombyrany serik etken Jandos Qulymbetov shákirt tárbielep júr. Kúi ónerin qarakózderimizge úiretip júrgen oqytýshy bir úidiń otaǵasy.
Jandos Qulymbetov, kúishi: «Táýelsizdik degenimiz basqa eldermen terezemiz teń bolý degen sóz. Táýelsizdikpen qurdaspyz. 27 jylda qol jetkizgen jetistigimiz kóp. Otbasyn quryp kishkentaily boldyq. Birneshe oqý orynyn bitirdim».
Táýelsizdik alǵan jyly ómir esigin ashqandar búginde birqatar belesterdi baǵyndyryp úlgerdi. Olardyń qatarynda sport juldyzy Daniiar Eleýsinov, ánshi Ali Oqapov ta bar.
