Aqparat jáne qoǵamdyq damý ministrligi Qazaqstan Táýelsizdiginiń 30 jyldyǵy qarsańynda óńirler jaily videorolikter seriiasyn jaryqqa shyǵarady, dep habarlaidy QazAqparat.
Memlekettik hatshy Qyrymbek Kósherbaevtyń tóraǵalyǵymen Aqordada ótken QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysynda Aqparat jáne qoǵamdyq damý ministri Dáýren Abaev Táýelsizdiktiń 30 jyldyǵyna orai videorolikter toptamasy ázirlengenin jetkizdi.
«Sizdiń tapsyrmańyz boiynsha (Memlekettik hatshy Qyrymbek Kósherbaevqa qarata) Táýelsizdiktiń 30 jyldyǵyna orai Qazaqstan týraly videorolikter toptamasyn ázirledik. Atap aitqanda, 7 rolik Qazaqstannyń óńirleriniń sulýlyǵyna arnalǵan. Videorolikterdiń taǵy bir parasy bizdiń eldiń týristik, investitsiialyq jáne ekologiialyq tartymdylyǵyna arnalǵan. 2019 jyly túsirilim jumystarymen respýblikalyq mańyzdaǵy úsh qala, sonymen qatar tórt oblys – Almaty, Mańǵystaý, Túrkistan jáne Shyǵys Qazaqstan oblystary qamtyldy», - dedi Aqparat jáne qoǵamdyq damý ministri Dáýren Abaev.
Ministr túsirilim tobyna barynsha qoldaý bildirgen Shyǵys Qazaqstan oblysynyń ákimdigine alǵysyn bildirdi.
«Olar sheteldikter edi. Shyǵys Qazaqstan oblysynda barynsha kómek kórsetilgenin aityp keldi. Qazirgi ýaqytta rolikterde belgili bir aimaqqa basymdyq berilmeidi. Tek respýblikalyq mańyzy bar qalalar atalyp ótedi. Biraq biyl taǵy 10 oblys boiynsha jumysty jalǵastyrsaq deimiz. Osylaisha, árbir óńir boiynsha jeke rolik ázirlenedi. Osyǵan bailanysty biyl túsirilim tobyna qoldaý bildirýdi aimaq basshylarynan ótinsem deimin. Ásirese, túsirilim jumystary úshin sátti lokatsiia tańdaýda kómek kerek. Joba úshin kásibiligi joǵary rejisserler men operatorlar tartylyp otyr. Biraq olar sheteldikter. Belgili bir aimaq maqtan tutatyn oryndardy olar bile bermeýi múmkin», - dedi ol.
Ministrdiń sózin tyńdaǵan Qyrymbek Kósherbaev qazaqtyń jerin saqtap qalǵan, sol úshin kúresken J.Táshenovti, tanymal ǵalym A.Baraevty óskeleń urpaqqa durystap jetkize bilý kerektigin atap ótti.
Aita ketsek, onyń aldynda ministr «Rýhani jańǵyrý» baǵdarlamasynyń 2020 jylǵa arnalǵan jańa josparyn tanystyrǵan bolatyn.
.jpeg)