Elimizdiń Táýelsizdiginiń 30 jyldyǵyn atap ótý aiasynda Qazaqstannyń Irandaǵy Elshiligi «Qazaqstan – Iran mádeni kúni» atty saltanatty is-shara uiymdastyrdy. Bul týraly QR SIM habarlady.
Oǵan Irannyń Mádeni mura, týrizm jáne qolóner jónindegi ministri Aliaskar Mýnesan, Gúlstan provintsiiasynyń gýbernatory Hadi Hakshenas, Parlament depýtaty Gýlamreza Montezari, Qazaqstan Elshisi Ashat Orazbai, biznes ókilderi jáne jergilikti qazaq diasporasynyń belsendileri qatysty.
Is-shara ashylýynda sóz sóilegen A. Mýnesan men Elshi Qazaqstan táýelsizdik alǵan kezden bergi 30 jyl ishinde túrli salalarda, sondai-aq Qazaqstan men Irannyń ekijaqty yntymaqtastyǵyn damytýda zor jetistikterge qol jetkizgenin atap ótti.
H. Hakshenas eki el arasyndaǵy óńiraralyq saýda-ekonomikalyq, mádeni, týristik, emdik týrizm, ziiarattyq bailanystardyń jaqsy damýda ekenine toqtaldy. Gúlstan provintsiiasynda qazaq halqynyń tarihi-mádeni eskertkishteri, iaǵni aqyn ári ǵalym Sultan Úbbi kesenesi (XII ǵasyr, Súleimen Baqyrǵanidyń úshinshi uly), dini ustaz ári ǵalym Shaǵurbattyń mazary (XVIII ǵasyr) jáne basqa qazaqtarǵa qatysty qasietti oryndar ziiarattyq týrizmdi damytýǵa jol ashady dep málimdedi. Provintsiia gýbernatory kóktemniń alǵashqy kúnderi ári eki elge ortaq Naýryz jańa jyl meiramy qarsańynda uiymdastyrylǵan «Qazaqstan – Iran mádeni kúnin» aldaǵy ýaqytta tiisti taqyryptaǵy aptalyq retinde jyl saiyn almakezek Mańǵystaý oblysy men Gúlstan provintsiiasynda ótkizip turý jóninde usynys bildirdi. Bul usynysty Iran Mádeni mura ministri quptady.
Ǵ. Montezari Qazaqstannyń táýelsizdik alǵanda ony alǵashqylardyń biri bolyp resmi tanyǵan Iranmen qarym-qatynastar barlyq salalarda jaqsy damýda, sonyń ishinde dástúrli mádeni bailanystardyń da tereńdegeniniń kýási bolyp otyrmyz, dep atap ótti.
Is-sharaǵa qatysýshylar Gorgan qalasynyń Ortalyq mádeniet úiiniń zaldarynda uiymdastyrylǵan jergilikti qazaq diasporasy qolóner sheberleriniń ulttyq buiymdaryna arnalǵan kórmeni aralap, Qazaqstan Táýelsizdiginiń 30 jyldyǵyna arnalǵan foto jáne beine materialdarmen tanysty.
Sonymen qatar, jergilikti qazaq diasporasy men irandyq ónerpazdar qoiǵan kontsertte ulttyq shaǵyn orkestr qazaq kúilerin tartyp, ánshiler qazaq jáne Iran halyq ánderin shyrqady.
