Táýelsizdiktiń 30 jyldyǵyn merekeleýdiń aqtyq kezeńi «Uly dala eli – Táýelsizdiktiń 30 negizi» atty 30 juldyzdy kúnmen túiindeledi, dep habarlaidy QazAqparat.
Mádeniet jáne sport ministri Aqtoty Raiymqulova halyq aldynda esep berý kezdesýinde osy 30 kúnde qandai sharalar ótetinin atady.
«Táýelsizdiktiń 30 jyldyǵyn merekeleýdiń sońǵy kezeńi «Uly dala eli – Táýelsizdiktiń 30 negizi» atty 30 juldyzdy kún bolmaq. Onyń aiasynda mádeniet uiymdarynyń kúnderi bastalady. Kún saiyn ónerdiń barlyq janryndaǵy jańa týyndylardyń tusaýkeserleri ótedi. Jyl boiy ónerdiń úzdik úlgilerin jasaýǵa, buqaralyq sport pen ishki týrizmdi damytýǵa jáne olardy odan ári ilgeriletýge baǵyttalǵan ideologiialyq-mazmundy jáne sapaly sharalardy ótkizý josparlanǵan», -deidi vedomstvo basshysy.
Sondai-aq, ol biyl «Ulttyq dombyra kúni» erekshe atalyp ótetinin, Elorda kúni qarsańynda barlyq óńirdiń mádeniet jáne óner qairatkerleri «Sálem, elorda!» atty festivalge qatysatynyn málim etti.
