Búgin Nur-Sultan qalasy ákiminiń orynbasary Baqtiiar Máken elordadaǵy ziialy qaýym ókilderimen kezdesti. Júzdesýdiń barysynda Táýelsizdiktiń 30 jyldyǵy, kórnekti tulǵalardyń aitýly mereitoilary, bas shahardyń rýhaniiaty men mádenietin damytýdaǵy ózekti máseleler talqylandy, dep habarlaidy "Ult aqparat".
Máken Nur-Sultan qalasy – Táýelsizdiktiń 30 jyldyǵynda tek saiasi-áleýmettik, qarjylyq-ekonomikalyq minberlerdiń emes, mádeniet pen ádebiettiń, óner men rýhaniiattyń da mártebeli tuǵyryna ainalǵanyn atap ótti.
«Qoǵamdy rýhani jańǵyrtyp, kemeldendirýde mádeniet pen ádebiettiń, óner men rýhaniiattyń yqpaly zor ekeni anyq. Prezidentimiz Qasym-Jomart Toqaev óziniń «Táýelsizdik bárinen qymbat» atty maqalasynda ótken otyz jyldyń ár on jylynda atqarylǵan isterge jeke-jeke toqtalyp, «Aldaǵy tórtinshi onjyldyqtyń bizge júkteitin mindeti – qýatty eldiń iesi jáne kemel halyq bolý. Bul jolda saiasi-ekonomikalyq reformalardy jáne sanany jańǵyrtý úderisin jalǵastyryp, zaman talabyna beiimdelgen ulttyń jańa bolmysyn qalyptastyrýymyz qajet» degen bolatyn. Memleket basshysy óz maqalasynda qazaq tilin damytý, ulttyq qundylyqtarymyzdy túletý, kino ónerin órkendetý, saiasi reformalar, bilim men ǵylym salasyn damytý, adam kapitalynyń sapasyn arttyrý siiaqty asa mańyzdy máselelerge toqtaldy. Bul Elbasymyz Nursultan Ábishulynyń bastamasymen dúniege kelgen «Mádeni mura», «Rýhani jańǵyrý» baǵdarlamalarynyń jalǵasy dep baǵalaýǵa bolady», – dedi Baqtiiar Máken.
Keiingi jyldary elordada mádeniet salasynda biraz jumystar atqaryldy. Atap aitqanda, qalamyzdyń birqatar mektepteri men kóshelerine uly tulǵalardyń esimderi berildi. Mundai igi jumystar aldaǵy ýaqytta da jalǵasa bermek.
«Byltyr Qalibek Qýanyshbaev teatry jańa záýlim ǵimaratqa kóshti. Onyń ornynda jasóspirimderge arnalǵan jańa teatr paida boldy. Jaqynda ǵana Nomad teatryna Halyq kaharmany Ázirbaijan Mámbetovtyń esimi berildi. Biyl jyr alyby Jambyl babamyzdyń 175 jyldyǵy. Soǵan orai Qalibek Qýanyshbaev teatrynda kórnekti tulǵanyń mereitoiynyń ashylý saltanaty ótedi. Sonymen birge búgin aqiyq aqyn Muqaǵali Maqataevtyń týǵanyna toqsan jyl tolyp otyr. Osy jyly áigili balýan Qajymuqan atamyzdyń 150 jyldyǵy, zańger Salyq Zimanovtyń 100 jyldyǵy jáne ózge mereitoilar bar. Olardy da tiisti deńgeide atap ótemiz dep josparlap otyrmyz», – dedi ákim orynbasary.
Odan keiin belgili aqyn, Memlekettik syilyqtyń laýreaty Nesipbek Aituly, tarihshy Búrkit Aiaǵan, filologiia ǵylymdarynyń doktory Serik Negimov, aqyn Serikzat Dúisenǵazin, Qazaqstan Jazýshylar odaǵy Nur-Sultan qalalyq filialynyń direktory, aqyn Dáýletkerei Kápuly, dástúrli ánshi Erlan Rysqali sekildi birqatar azamat sóz alyp, qalanyń rýhani-mádeni ómirin kórkeitýge qatysty oi-pikirin aitty. Astana rýhaniiatynyń damýyna úles qosqan, qazir ómirde joq, elimizge tanymal keibir azamattardyń esimine kóshe, mektep berý týraly sóz qozǵaldy. Qalalyq Ishki saiasat basqarmasynyń basshysy Dáýren Babamuratov óz salasynda atqarylǵan jumystarǵa toqtaldy.
Jiyndy qorytqan Baqtiiar Máken aitylǵan usynystyń bári eskeriletinin aita kelip, basqosýdyń sońynda Muqaǵali Maqataevtyń týǵan kúnine orai aqiyq aqynnyń bir óleńin oqyp berdi.
