«Táýelsizdik urpaqtary» grantynyń iegeri Anton Ivlev demografiialyq boljamdar jasaýǵa arnalǵan aqparattyq júie qurastyrmaqshy, dep habarlaidy QazAqparat tilshisi.
«1S-Reiting» JShS baǵdarlamashysy, D.Serikbaev atyndaǵy Shyǵys Qazaqstan tehnikalyq ýniversitetiniń magistranty Anton Ivlev «Táýelsizdik urpaqtary» grantyn tabystaý sátinde osylai dedi.
«Eki jyl buryn maǵan bir bedeldi demograf jyl saiyn myńdaǵan IT maman oqý bitirip jatqanymen, olardyń sanaýlysy ǵana demografiiaǵa bet buratynyn aitqan edi. Magistratýranyń birinshi kýrsynda oqyp júrgende demografiialyq derekterdi taldaýmen ainalysa bastadym. Óitkeni men salanyń keleshegi bar ekenin kórdim. Bul ǵylym salasynda da, aqparattyq tehnologiialar salasynda da, ásirese, búgingi demografiialyq ósýim kezeńinde sheksiz tájiribe bolatyny anyq edi. Men zertteýshilerdiń bári paidalana alatyn, aýqymdy derekterdi ońai baǵdarlap, aldaǵy jyldardyń demografiialyq boljamyn jasaýǵa múmkindik beretin yńǵaily aqparattyq júieni qurǵym keledi», - deidi maman.
Anton Ivlevtiń aitýynsha, aqparattyq júie ǵalymdarǵa keleshkti boljap qana qoimai, burynǵy derekter boiynsha taldaý jasaýǵa da jol ashady. Ǵalymdarǵa ońai qoldanýǵa bolatyn taqyryptyq jeliler bolady.
«Sonymen qatar, júieniń arqasynda biz ótkenge kóz júgirtip, burnaǵy jyldardaǵy demografiialyq derekterdiń olqy tustaryn tolyqtyra alamyz. Munyń bári qazir oi ǵana. Tek alǵashqy qadamdy bastadyq deýge bolady. Qasym-Jomart Kemeluly, Sizge osy iste múmkindik berip, qoldaý kórsetkenińiz úshin alǵys aitamyn. Bul biz siiaqty jas ǵalymdar úshin ǵylymmen ainalysýǵa jáne damýdyń jańa joldaryn izdeýge úlken yntalandyrý bolaǵyna senimdimin», – dedi jas ǵalym.
