QR Aqparat jáne qoǵamdyq damý ministri Aida Balaeva Prezidenttik jastar kadrlyq rezervi men «Táýelsizdik urpaqtary» granty týraly aityp berdi, dep habarlaidy QazAqparat.
Aita keteiik, Nur-Sultanda «Táýelsizdik urpaqtary» respýblikalyq jastar forýmy ótip jatyr.
«Daryndy jastardy qoldaityn strategiialyq sharalarynyń biri – jastardyń kadrlyq rezervi boldy. Bul joba joǵary bilikti jas mamandardyń memlekettik basqarý júiesine túsýine múmkindik berdi. Qazir prezidenttik kadrlyq rezervke qabyldaýdyń ekinshi kezeńi júrip jatyr. Onyń aiasynda qosymsha 150 jas mamandy irikteý josparlanýda», - dedi Aida Balaeva «Táýelsizdik urpaqtary» atty jastar forýmynda.
Ministr elimizde ǵylym, mádeniet, aqparattyq tehnologiialar, biznes jáne BAQ salalaryndaǵy jastardyń 30 jobasy men bastamasyn qoldaý maqsatynda jyl saiyn beriletin «Táýelsizdik urpaqtary» granty bekitilgenin aitty. Onyń kólemi úsh million teńgeni quraidy.
«Biyl sarapshylar talqylaýynyń nátijesinde konkýrstyq komissiia 30 úzdik jobany tańdady. Sizder de osy granttardyń tusaýkeserine kýá bolasyzdar dep oilaimyn», - dedi Aida Balaeva.
Sondai-aq, A. Balaeva forýmnyń jastar saiasaty salasyndaǵy qorytyndylardy shyǵaryp qana qoimai, túitkildi máselelerdi de talqylap, olardy sheshý joldaryn aiqyndaitynyn jetkizdi.
«Qazaqstannyń Tuńǵysh Prezidenti – Elbasy Nursultan Nazarbaev Táýelsizdik alǵan kúnnen bastap jastarǵa, olardyń máselelerine jáne sapaly damýyna úlken kóńil bóldi. Búgin sizderge barlyq jol ashyq, al sizderdiń mindetterińiz – eldi budan da kúshti jáne básekege qabiletti etý», - dedi Aida Balaeva.
