Túrkistan oblysy Maqtaaral aýdanynyń Táýelsizdik qurdastary aýdan jastaryna Úndeý joldady, dep habarlaidy "Ult aqparat".
***
«Qadirli zamandastar!
Qurmetti Maqtaaraldyq jas jerlesterimiz!
Biz elimizdiń azat atanǵaly bergi tarihymen qatarlas – «Táýelsizdik qurdastary» ekendigimizdi maqtan tutamyz. Qanshama jyldardan beri bizdiń ata-babamyz azattyqtyń aq tańyn ańsap kelgendigi kóne tarihtan belgili. Táýelsiz bolý baǵytyndaǵy kúres – ata-babalarymyzdyń jerin, elin qorǵap qalýdan bastaý alyp, bertin kele qazaqtan shyqqan «Alash» ziialylarynyń qajyrly is-áreketterinen kórinis tapty.
Jańa qoǵamdaǵy eń bir eleýli, búkil qazaq jastary jumylǵan kóterilis – «Jeltoqsan oqiǵasy» boldy. Osy bir jastardyń Almaty qalasyndaǵy kóterilgen tolqynynyń áseri – 1991 jyly qol jetkizgen azattyqtyń bastaýy boldy dep aitýǵa negiz bar. Halqynyń bolashaǵy úshin kóteriliske shyqqan qanshama bozdaqtar – qyrshynynan qiylyp, qýdalaýǵa ushyrady. Sol oqiǵanyń belsendileri Qairat, Lázzat sekildi aǵa-apalarymyz bizdiń jadymyzda máńgi saqtalmaq.
Biz óz Otanymyzdyń ózge bir memlekettiń qol astynda bolǵandyǵyn kózimizben kórmesek te, ata-analarymyzdan jáne bilim ordasynda oqyp-bildik. Sol bodandyq jyldary men búgingi kúndi salystyryp qaraý múldem múmkin emes. Búginde Qazaqstan ózindik sipatymen, órkendeý jolymen, saiasi ustanymymen álemdik arenada erekshelengen memleket.
Táýelsizdik alǵan 27 jyldyń ishinde ekonomikamyz damyp, halqymyzdyń ál-aýqaty jaqsardy. Tilimiz, dinimiz, mádenietimiz jandana tústi.
Elde qoǵamdyq-saiasi turaqtylyq berik ornady. Dinaralyq kelisim men ulttar arasyndaǵy tatýlyq otandastarymyzdyń basty qundylyǵyna ainaldy.
Nátijesinde jastar saiasatyna degen betburys qarqyn ala bastady. 2004 jylǵy 7 shildede «Qazaqstan Respýblikasyndaǵy memlekettik jastar saiasaty týraly» Zań qabyldandy. Osy zań negizinde jastar saiasatynyń negizgi baǵyttary aiqyndalyp, olardyń áleýmettik, saiasi quqyqtary naqtylandy. Bul úrdister jyl artqan saiyn óziniń jalǵasyn tabýda.
Elbasy Nursultan Nazarbaev Qazaqstan halqyna arnalǵan Joldaýynda 2019 jyldy Jastar jyly dep jariialaýdy usyndy. Joldaý elimizdiń áleýmettik-ekonomikalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnaldy. "Biz Qazaqstannyń bolashaǵy sanalatyn jastardy qoldaýymyz kerek. Jastar men otbasy institýtyn keshendi qoldaý – memlekettik saiasatynyń basymdylyǵyna ainalýy tiis. Jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerek. Kelesi jyldy Jastar jyly dep jariialaýdy usynamyn", - dedi Memleket basshysy.
Qadirli jastar!
Eńseli eldiń erteńi – jastar, biz bolmaqpyz. Búgingi jastar – erteńgi el tizginin ustar azamattar. Sondyqtan, Táýelsizdigimizdi ardaqtap, basty bailyǵymyz ekenin árqashan este saqtaiyq.
El bolashaǵy – bilimdi, isker jastardyń qolynda. Elbasy Nursultan Ábishulymen birge elimizdi órkendetýge úlesimizdi qosýǵa atsalysaiyq!
Biz Táýelsizdik alǵan jyly dúniege kelgen túlekter aýdan jastaryn aýdannyń, aýyldyń órkendeýine laiyqty úles qosýǵa, belsendi, bilimdi bolýǵa shaqyramyz», - delingen Úndeýde.
