Qazaqstan Respýblikasy Táýelsizdiginiń 30 jyldyǵyna orai Nur-Sultanda demeýshilik qarajat esebinen uiymdastyrylǵan merekelik saliýt bolady, dep habarlaidy elorda ákimdiginiń resmi saity.
Merekelik otshashý búgin, 15 jeltoqsanda saǵat 21:00-de qalanyń úsh núktesinen bastalady:
- Botanikalyq baqtyń aýmaǵy;
- Atyraý kópiriniń soltústigindegi Esil ózeniniń sol jaǵalaýy;
- Aqbulaq ózeniniń soltústik jaǵy, Pýshkin kóshesi men Abylai han dańǵylynyń qiylysy.
Aita ketý kerek, Táýelsizdik kúnin merekeleý áleýmettik nysandardyń ashylýymen qatar júredi: 20 myńnan astam oqýshy ornyna eseptelgen jeti mektep, 2,5 myń áleýmettik páterge 6 kóppáterli turǵyn úi kesheni (Qoljetimdi turǵyn úi), úleskerlerdiń 2 myń 400 otbasyna 9 úlestik qurylys nysany jáne t. b.
Sonymen qatar, mereitoilyq dataǵa orai qalanyń mádeniet mekemeleri kórmelerden bastap tarih sabaqtaryna deiin birqatar is – sharalar daiyndaýda.
16 jeltoqsanda Táýelsizdik kúnine orai "Nomad City Hall" sahnasynda "Jas Abai" spektakli kórsetiledi.
16 jáne 17 jeltoqsanda Astanalyq tsirktiń bas manejinde "Astanalyq tsirk ot jaǵady" qaiyrymdylyq tsirk baǵdarlamasy ótedi.
17 jeltoqsanda "Jastar" saraiy "Meniń Otanym – Qazaqstan" kontserttik baǵdarlamasyna shaqyrady.
Elorda kitaphanalary el Táýelsizdiginiń 30 jyldyǵyn merekeleýge orai qala turǵyndary úshin is-sharalar daiyndady.
15 jeltoqsan kúni № 3 buqaralyq kitaphanada "Táýelsizdiktiń bastaýy - jeltoqsan" atty tarih sabaǵy, №5 buqaralyq kitaphanada "Táýelsizdik týy astynda 30 jyl" atty aqparat saǵaty, №15 buqaralyq kitaphanada "Táýelsizdik – eldiń tiregi" atty tarih saǵaty ótkiziledi. 16 jeltoqsanda Ortalyq balalar men jasóspirimder kitaphanasy " Táýelsiz elim – Qazaqstanym" kitap kórmesine, №2 Balalar kitaphanasy "Egemen elmiz, erkinbiz! erteńgiligine, al № 3 buqaralyq kitaphana – "Jeltoqsan kóterilisi-táýelsizdikke umtylǵan jastardyń kúresi" atty tarih sabaǵyna shaqyrady.
Barlyq is-sharalar sanitarlyq normalardy saqtai otyryp júrgiziledi. Elorda turǵyndary men qonaqtary maska rejimi men áleýmettik qashyqtyq týraly umytpaýy kerek.
