Almatyda «Samuryq-Qazyna» AQ kompaniialar toby bas demeýshi bolyp, Qazaqstan Jazýshylar odaǵy uiymdastyrǵan «Aitumar» balalar ádebietiniń úzdik týyndylary respýblikalyq baiqaýynyń jeńimpazdary marapattaldy.
Júlde qory 12 300 000 teńgeni quraityn baiqaýǵa poeziia, proza jáne dramatýrgiia baǵyttary boiynsha 200-ge tarta shyǵarma kelip tústi. Onyń ishinde ár janr boiynsha 6 adamnan jeńimpaz dep tanylyp, ár atalym boiynsha I oryn (bireý) – 1 000 000 teńge, II oryn (ekeý) – 800 000 teńge, III oryn (úsheý) – 500 000 teńge tabystaldy.
Nátijesinde proza janry boiynsha I oryn Arman Ádilbekke, II oryn Meiirjan Jylqybai men Ziiadibekov Nurasylǵa jáne III oryn Mereke Aisáýle, Ábdimanap Dana, Qarlyǵash Sarbaevaǵa buiyrdy.
Poeziia janry boiynsha I oryndy Merei Qart, II oryndy Aidana Beisen, Asylan Tilegen jáne III oryndy Muqaǵali Kenjetai, Aidana Segizbai, Nurbibi Aiazbai ielendi.
Dramatýrgiia boiynsha I oryn Nazerke Qumarǵalievanyń, II oryn Álibek Baibol men Janserik Quttybaevtyń jáne III oryn Jánibek Qoitai, Rahat Álisher, Yqylas Shalǵymbaidyń enshisine buiyrdy.
«Barshańyzdy osy Táýelsizdik kúni qarsańynda bolyp jatqan aitýly sharamen quttyqtaýǵa ruqsat etińizder. «Aitumar» respýblikalyq baiqaýynyń jeńimpazdaryna ári qarai da biik shyǵarmashylyq tabystar tileimin. Atalǵan balalar ádebieti saiysy jas qalamgerlerge shabyt, elimizge mol rýhani azyq syilady dep úmittenemin. Osylaisha «Samuryq-Qazyna» AQ kompaniialar toby memlekettik tildi damytýǵa úles qosady. Biz Balalar jyly Jazýshylar odaǵy qolǵa alǵan igilikti istiń mańyzyn jete túsinip, qoldaýdy jón dep taptyq. Egemendigimiz máńgi, urpaǵymyz aman bolsyn», - dedi marapattaý rásimine qatysqan «Samuryq-Qazyna» AQ kompaniialar tobynyń biryńǵai qaiyrymdylyq operatory - «Samruk-Kazyna Trust» qory bas direktorynyń orynbasary Serǵoja Qaliasqarov.
Baiqaýǵa 14-35 jas aralyǵyndaǵy, QR aýmaǵynda turatyn kez-kelgen qalamger qatysa aldy. Ár qatysýshydan tek bir ǵana atalym boiynsha proza, poezziia jáne dramatýrgiia janrlarynda shyǵarmalar qabyldanyp, joǵaryda keltirgenimizdei, jalpy alǵanda 18 jeńimpaz marapattaldy.
«Atalmysh baiqaý Balalar jylynyń eń ozyq is-sharalarynyń biri bolyp otyr. Sońǵy jyldary qazaq ádebietinde balalar ádebieti janrynyń kenje qalyp bara jatqany, al erekshe balalar úshin ádebiettiń tipti de qoljetimsizdigi jii aitylyp júr. Munymen qosa «Meniń atym Qoja» syndy tutas býyndy tárbieleitin shyǵarmalardyń joqtyǵyna ziialy qaýym ókilderi qynjylys bildirip jatady. Bul rette qazaq rýhaniiatynyń qarashańyraǵy Qazaqstan Jazýshylar odaǵy tól ádebietimizdi damytý baǵytynda aýqymdy jobalar uiymdastyryp keledi. «Aitumar» balalar ádebieti týyndylarynyń respýblikalyq baiqaýy osyǵan dálel», - dedi Qazaqstan Jazýshylar odaǵynyń basqarma tóraǵasy, aqyn, QR Memlekettik syilyǵynyń iegeri Ulyqbek Esdáýlet.
Joba barysynda uiymdastyrýshylar baiqaýǵa kelip túsken shyǵarmalardy balalarǵa, onyń ishinde olardyń múmkindigi shekteýli qatarlastaryna kóbirek nasihattaýǵa basymdyq berip, shyǵarmalar ońai oqylý úshin aýdio, elektrondy nusqalary ázirlenedi. Sonymen qatar, jeńimpaz atanǵan shyǵarmalar jinaqtalyp, kitap bolyp jaryq kóredi. Kitap elimizdegi 200-ge tarta kitaphanaǵa, inkliýzivti ortalyqtar men balalar úiine taratylady dep josparlanýda.
