Kino áleminde bir-birine ǵashyq bolyp, sońynda qosylatyn keiipkerler az emes. Alaida keide ekrandaǵy sezim túsirilim alańynan tys jerde de jalǵasady. Bir filmde ǵashyqtardyń rólin somdaǵan akterler ýaqyt óte bir-birine shyn kóńilden ǵashyq bolyp, shańyraq kóterip jatady. Qazaq kinosy men telehikaialarynda da osyndai mahabbat hikaialary kezdesedi, dep habarlaidy ult.kz.
1. Dariǵa Badyqova men Oljas Abai
Qazaq kinosynyń tanymal juby Dariǵa Badyqova men Oljas Abai ekrandaǵy mahabbat hikaiasyn shynaiy ómirde jalǵastyrdy. Ekeýi 2023 jyly jaryq kórgen “Taptym-aý seni” filminde Sáýle men Jeksenniń rólin somdap, kórermenniń yqylasyna bólendi. Keiin akterler “Tastaimyn-aý seni” jáne “Taptym-aý seni 2” filmderinde de birge óner kórsetti. Alǵashynda olardyń qarym-qatynasy tek shyǵarmashylyq seriktestik pen dostyqqa negizdelgen. Oljas Abai suhbattarynyń birinde Dariǵamen alǵashqy túsirilim kezinde til tabysý ońai bolmaǵanyn da jasyrmaǵan. Ýaqyt óte ekeýi jaqyn aralasyp, aralaryndaǵy dostyq mahabbatqa ulasqan. 2026 jyldyń qyrkúieginde Oljas Abai áleýmettik jelide Dariǵaǵa degen sezimin ashyq bildirip, oǵan ǵashyq ekenin jetkizdi. Arada kóp ýaqyt ótpei, qos óner iesiniń qudalyǵynan túsirilgen beinejazbalar jelide tarady. Al 12 qazanda Dariǵa Badyqova men Oljas Abai Almatyda dúrkiretip úilený toiyn ótkizdi. Osylaisha birneshe jyl boiy kinoda jup bolyp oinaǵan akterler shynaiy ómirde de shańyraq kóterdi.
2. Quman Tastanbekov pen Merýert Ótekeshova
Qazaq kinosynyń eń tanymal mahabbat hikaialarynyń biri – Quman Tastanbekov pen Merýert Ótekeshovanyń taǵdyry. Ekeýi rejisser Sultan Qojyqov túsirgen “Qyz Jibek” filminde Tólegen men Jibektiń rólin somdady. Túsirilim bastalǵanda Merýert Ótekeshova nebári 17 jasta bolǵan. Kinoda bir-birine yntyq bolǵan eki jastyń sezimi keiin shynaiy ómirde de jalǵasyn tapty. Aktrisanyń aitýynsha, olar film aiaqtalǵan boida úilenbegen, biraz ýaqyt kezdesip júrgen. Jastyq shaqtarynda ekeýi tańerteń quimaqhanaǵa baryp, birge ýaqyt ótkizýdi ádetke ainaldyrǵan. Quman Tastanbekov túsirilim kezinde bolashaq jaryna daladan terip alǵan gúl syilaǵan. Merýert Ótekeshova sol gúldi ondaǵan jyl boiy saqtap kelgenin aitqan. Keiin óner ieleri shańyraq kóterip, Jibek, Tomiris jáne Farabi esimdi úsh balanyń ata-anasy atandy. Quman Tastanbekov 2017 jyly dúnieden ótse de, olardyń mahabbat hikaiasy qazaq kórermeniniń jadynda saqtalyp qaldy.
3. Talǵat Nyǵmatýlin men Venera Nyǵmatýlina
Kino arqyly tabysqan taǵy bir tanymal jup – akter Talǵat Nyǵmatýlin men aktrisa Venera Nyǵmatýlina. Ekeýi 1981 jyly rejisser Melis Ýbýkeev túsirgen “Provintsiialyq roman” filminde birge oinady. Kartinada Talǵat Murat esimdi er adamnyń, al Venera Gýlia esimdi qyzdyń beinesin somdaǵan. Filmde eki keiipkerdiń arasyndaǵy kúrdeli mahabbat oqiǵasy baiandalady. Osy túsirilim barysynda akterler bir-birine jaqyn bolyp, aralarynda sezim paida bolǵan. Keiin Talǵat Veneraǵa úilenýge usynys jasap, ekeýi otbasyn qurdy. 1983 jyly olardyń Linda esimdi qyzy dúniege keldi. Linda Nyǵmatýlina da ata-anasynyń jolyn qýyp, akterlik ónerdi tańdady. Ókinishke qarai, 1985 jyly Talǵat Nyǵmatýlin qaitys bolyp, erli-zaiyptylardyń ortaq ómiri erte úzildi. Soǵan qaramastan olardyń mahabbat hikaiasy kino tarihyndaǵy este qalarlyq oqiǵalardyń biri bolyp qaldy.
4. Ermek Turǵanbek pen Narqyz Aidarova
Ázilhan Nurshaiyqovtyń “Mahabbat, qyzyq mol jyldar” romany jelisimen túsirilgen telehikaiadaǵy Erbol men Meńtaidyń mahabbaty shynaiy ómirde de jalǵasyn tapty. Basty rólderdi somdaǵan Ermek Turǵanbek pen Narqyz Aidarova túsirilim kezinde bir-birine ǵashyq bolyp, keiin shańyraq kóterdi. Ekeýi buǵan deiin T. Júrgenov atyndaǵy óner akademiiasynda oqyp júrgende birin-biri syrttai tanyǵanymen, jaqyn aralaspaǵan. Al telehikaiaǵa daiyndyq barysynda jii kezdesip, bir-birin jaqynyraq tani bastaǵan. Ermektiń aitýynsha, túsirilim bastalǵannan keiin bir jarym ai ótkende Narqyzǵa degen sezimin anyq túsingen. Keiin ol qyzǵa kóńilin bildirip, kezdesýge usynys jasaǵan. Narqyz da ǵashyqtardyń rólin somdaý barysynda Ermekke baýyr basyp qalǵanyn aitqan. Tipti túsirilim toby ekeýiniń bolashaqta otbasyn quratynyn aldyn ala ázildegen eken. Aqyry 2020 jyldyń 19 qyrkúieginde telehikaianyń túsirilimi aiaqtalyp, kelesi kúni, 20 qyrkúiekte qos ǵashyq shańyraq kótergen. Keiin erli-zaiyptylar uldy bolyp, otbasylyq ómirin birge jalǵastyrdy.
Kelesi juptyń oqiǵasy kino emes, teatr sahnasyndaǵy mahabbattyń ómirmen ushtasqan mysaly.
5. Azamat Satybaldy men Nazgúl Qarabalin
Azamat Satybaldy men Nazgúl Qarabalinanyń mahabbaty da ónermen tyǵyz bailanysty. Ekeýi alǵash ret óner akademiiasynda bir kýrsta oqyp júrgende tanysqan. Nazgúl Qarabalina suhbattarynyń birinde Azamatqa alǵash bolyp ózi ǵashyq bolǵanyn jasyrmaǵan. Keiin qos óner iesi teatr sahnasynda da jup bolyp óner kórsetti. Olar “Mahabbat dastany” spektaklinde Qozy men Baiannyń beinesin somdaǵan. Azamat Satybaldynyń aitýynsha, qoiylym bastalǵan kezde ekeýi áli qyz ben jigit bolyp júrgen. Keiin otbasyn qurǵanymen, ǵashyqtardyń rólin sahnada birneshe jyl boiy oinaýdy jalǵastyrǵan. 2018 jyly spektakldiń júzinshi qoiylymynda ekeýi Qozy men Baiandy sońǵy ret somdady. Al 2026 jyly erli-zaiyptylar “Mama!” tolyqmetrajdy filminiń túsirilimine birge qatysty.
Keide óner adamdarynyń taǵdyry ózderi somdaǵan keiipkerlerdiń oqiǵasymen úndesip jatady. Kórermendi tánti etken ǵashyqtar ýaqyt óte bir-biriniń ómirinen de erekshe oryn tapqan. Mundai oqiǵalar kinonyń tek qiialdan týǵan dúnie emes, adam taǵdyrymen de tyǵyz bailanysty ekenin ańǵartady. Al kópshiliktiń júreginen oryn alǵan bul juptardyń tanystyǵy men otbasylyq tarihy áli de qyzyǵýshylyq týdyryp keledi.
