Túrkistan oblysynda bir ǵasyrǵa jýyq tarihy bar irgeli Maqtaaral aýdanynyń jurtshylyǵy qasietti Táýelsizdik merekesin joǵary deńgeide atap ótti. Saltanatty sharada aýdanda jemisti eńbek etip, óz kásibiniń naǵyz mamany atanyp, aýdannyń damýyna súbeli úlesin qosyp júrgen birqatar azamattar marapattaldy, dep habarlaidy "Ult aqparat".
Elimiz óz aldyna shańyraq quryp, otaý tikkenine de 27 jyldyń júzi boldy. Bul tarih úshin qas-qaǵym sát bolsa da, elimiz úshin ár kúni qarbalas tirshilikterge toly mereili, mártebeli sátterge ainaldy.
Táýelsizdik halqymyz úshin júzege asyp, úkili úmitke toly ulttyq múdde memlekettik múddemen úilesim tapqanyn, endigi rette eldiń ómirinde usaq-túiek másele degenniń bolmaitynyn aitqan Maqtaaral aýdanynyń ákimi Baqyt Asanov «Táýelsizdik merekesi san ǵasyrlar boiy armandaǵan erjúrek ata-babamyzdyń urpaǵy – bizge buiyryp otyr. Bul mereke bizdiń erjúrek batyrlarymyzdyń merekesi. Barshamyz úshin qadirli de qasietti bolǵan merekemiz qutty bolsyn!» dep, jinalǵan jurtshylyqty merekemen quttyqtady.
Elbasy Jarlyǵymen qaitadan enshisin alyp shyqqan Maqtaaral aýdanynyń biylǵy jetistikteri dáriptelip, jyl qorytyndylandy. San salanyń úzdikteri Elbasynyń, oblys jáne aýdan basshylarynyń merekelik tósbelgilerimen marapattaldy. Saltanatty shara sońynda shyrqalǵan árbir patriottyq án merekege kelgen aýdan turǵyndarynyń júrekterine ultjandylyqtyń nuryn seýip, bostandyq pen Táýelsizdiktiń qymbat qýanysh ekenin jetkizgendei.
