Nur-Sultan qalalyq prokýratýrasy tergeý izoliatorynda qaza tapqan belsendi Dýlat Aǵadildiń múrdesin jerleý aldynda jýyndyrý orynan áleýmettik jelige taraǵan videoǵa qatysty jaýap berdi, dep habarlaidy QazAqparat.
«Eń aldymen mezgilsiz qaza tapqan Aǵadildiń jaqyndary men týǵan-týystaryna kóńil aitamyz. Áleýmettik jeliler men Internet resýrstarda D.Aǵadildiń múrdesin jerleý aldynda jýyndyrý ornynan oǵan qatysty zorlyq-zombylyq jasalyndy delingen pikirlermen videomaterialdar jappai taralyp jatyr. Birden aitaiyn, bul ádep pen ǵibrat normalaryna qaishy keledi. Videojazba qaza tapqan adamnyń týystarynyń kelisiminsiz túsirilip, taratylǵan», - dedi Nur-Sultan qalasy prokýrorynyń orynbasary Eldos Qilymjanov.
Qazirgi ýaqytta qajetti barlyq tergeý amaldary júrgizilip jatqanyn aitqan onyń sózine qaraǵanda, áleýmettik jelide taraǵan vieomaterialdarda múrdede dene jaraqaty syndy daqtardyń bar ekendigi kórsetilgen.
«Óz tarapymyzdan múrdedegi daqtyń biologiialyq ólim belileri sanalatyndyǵyna nazar aýdartqymyz keledi. Meditsina tilimimen aitsaq, daq júrek qyzmetin toqtatqanda jáne 1 saǵattan keiin paida bolýy múmkin», - dedi E.Qilymjanov.
Osy rette táýelsiz sot-meditsina sarapshysy Arman Ahanbekov te múrdede daqtyń qalai paida bolatyndyǵyn túsindirip berdi.
«Adam ólgennen keiin múrdede paida bolatyn daq múrdeniń ózgeristerge ushyraýy sanalady. Naqtylai túser bolsam, bul múrdeniń barynsha tómen ornalasqan bóligine salmaqtyń áserinen qannyń jinalyp qalǵan bóligi. Múrde daǵy damýynyń, pishiniń jáne túsiniń belgili bir rettiligi bar. Bir-eki táýlikten keiin ádette múrde daǵy aralaspaidy. Iaǵni, daǵy múrdeniń belgili bir bóliginde bolsa, sol jer qalyp qoiyp, pishin de ózgertpeidi. Ádette onyń túsi qara-kók, qara-qoshqyl bolyp keledi. Adam ólgennen keiin onyń qandai da bir dene jaraqaty retinde qarastyrylýy oryndy. Degenmen múrdeni qaraý barysynda videoda sipattalǵandai qandai da bir dene jaraqattary anyqtalǵan joq», - dedi A.Ahanbekov.
Osy rette Nur-Sultan qalasy prokýrorynyń orynbasary Eldos Qilymjanov belsendiniń ólimine qatysty tergeý amaldary jan-jaqty júrgizilip jatqandyǵyn basa aitty.
«Alǵashqy kúnnen-aq táýelsiz sarapshylar jumyldyrylyp, foto jáne video túsirilimder qoldanyldy. Qazir biz sarapshylyq zertteýdiń resmi qorytyndysyn kútýimiz qajet. Azamattardan asyǵys qorytyndy shyǵarýdan jáne jalǵan aqparat taratýdan tartynýǵa shaqyramyz. Búgin qaza tapqan Dýlat Aǵadildiń anasy otbasynyń kelisiminsiz video túsirip, ony taratqan tulǵaǵa shara qoldaný týraly aryzben júgindi. Ol bul videojazbaǵa ashýlanyp otyr», - dedi ol.
Esterińizge sala ketsek, 25 aqpanda Nur-Sultan qalasynyń tergeý izoliatorynda belsendi Dýlat Aǵadildiń qaza tapqany belgili bolǵan edi.
