16 mamyrdan bastap elimizde «jasyl» aimaqta ornalasqan qazaqstandyq importtaýshylardyń meken-jaiyna ákelingen taýarlardyń tranziti kezinde elektrondy kedendik súiemeldeý qoldanylady, dep habarlaidy "Ult aqparat" Memlekettik kirister komitetine silteme jasap.
«16 mamyrda Qarjy ministriniń «Kólik quraldaryn elektrondy kedendik alyp júrýdi qoldaný, sondai-aq memlekettik kirister organdarynyń, deklaranttyń, halyqaralyq avtomobil tasymaldaryn qadaǵalaý aqparattyq júiesiniń ulttyq operatorynyń jáne tasymaldaýshynyń kólik quraldaryn elektrondyq kedendik alyp júrý kezinde ózara is-qimyl jasaý qaǵidalaryn bekitý týraly» 2021 jylǵy 28 sáýirdegi № 407 buiryǵy qoldanysqa enedi.
Buiryq «Qazaqstan Respýblikasyndaǵy kedendik retteý týraly» QR Kodeksiniń 437-babyn iske asyrý maqsatynda ázirlengen jáne spýtniktik navigatsiianyń tehnikalyq quraldaryn (navigatsiialyq plombalar) paidalaný arqyly kedendik tranzittiń kedendik rásimine sáikes Qazaqstan aýmaǵynda sheteldik taýarlardyń tasymaldanýyn qadaǵalaýdy kózdeidi», delingen habarlamada.
Komitettiń málimetinshe, atalmysh buiryqty ázirleý kezinde navigatsiialyq plombalardy qoldanyp pilottyq jobalardy ótkizý tájiribesi, sondai-aq Eýraziialyq ekonomikalyq komissiia alańynda Taýarlar tranzitiniń biryńǵai júiesin jetildirý boiynsha júrgizilgen jumys eskerilgen.
Elektrondy kedendik súiemeldeý «jasyl» aimaqta ornalasqan qazaqstandyq importtaýshylardyń meken-jaiyna ákelingen, keden zańnamasyn buzý qaýpine az ushyraityn sheteldik taýarlardyń sanattaryna qatysty táýekelderdi basqarý júiesiniń usynymdary negizinde qoldanylady.
«Tikelei elektrondy kedendik súiemeldeý kólik quraldarynyń júk bólimderine navigatsiialyq plombalardy ilý jáne kólik quraly jóneltiletin keden organynan bastap baratyn keden organyna deiingi qozǵalysyn qashyqtyqtan qadaǵalaý arqyly júzege asyrylady», - delingen habarlamada.
Elektrondy kedendik súiemeldeýdi engizý tranzit kezinde kedendik operatsiialardy jeńildetýge, olardy júzege asyrý ýaqytyn jáne tranzittik tasymaldaýǵa qarjylyq shyǵyndardy qysqartýǵa baǵyttalǵan.
